Lij lauxsae gingqyaez:

Mwngz ndei! Yaek cuengqgyaj lo, mwngz hong gig nyaengq ba? Yienznaeuz mwngz mbouj son gou lo, hoeng, gou lij dwg cibfaen siengjniemh mwngz, gou nyangz daengz gienh saeh simnyap ndeu, maqmuengh ndaej daengz mwngz bang gou.

Mboengq gonq, baengzyoux ndei gou Leiz Sahsah gvaq ngoenzseng, de laeglemx iu gou caeuq ndaw ban geij boux baengzyoux ndei, gangj ndei gyanghaemh bae ranz de angqhoh, gou angqvauvau dapwngq lo, lij cawx ndei laex dem. Hoeng, dauqma ranz baez lwnh daxboh daxmeh nyi, gyoengqde couh mbouj doengzeiq gou bae, gangjnaeuz gyanghaemh mbouj ancienz, gou couh bae mbouj baenz. Daj gienh saeh neix gvaqlaeng, baengzyoux ndei gou Leiz Sahsah couh mbouj leixlangh gou lo, gij baengzyoux ndei wnq hix ciemhciemh damh gou lo, baezlaeng miz doengzhag gvaq ngoenzseng seiz, cungj daegdaengq ndoj gou, lij laeglemx comz youq itheij gangjgangj riuriu, gou baez byaij gyawj, gyoengqde couh sanq lo. Bingzseiz hihi haha gvenq lo, seizneix raen gyoengq doih miz gangj miz riu mbouj swt gou, gou ndawsim gig nanzgvaq.

Lij lauxsae, mwngz ndaej lwnh gou nyi, gou yaek baenzlawz guh lwi?

Hoh mwngz ndangcangq!

Hagseng: Suhsuh

Bi 2016 Ndwen 1 Ngoenz 18

（指导老师：覃珍团）