9 nyied 20 hauh, dwg ngoenz- seng daxmeh. Daxmeh gou ndaej 35 bi lo, de vih daengx ranz vunz daengx bi guhhong mbouj dingz, gig sinhoj. Gou caeuq daxboh laeglemx vih ngoenzseng daxmeh bwh faenh laex ndeu.

Gou veh fuk dozveh gyaeundei ndeu, mbouj rox daxboh yaek soengq gijmaz laex hawj daxmeh, dou cungj gag bauj mimiz. Haetcaeux, gou caeuq daxboh angqvauvau bae haw dingh aen dangauh youh hung youh gyaeundei ndeu, daxmeh cungj mbouj rox, de lij ciuqyiengh bae guhhong ne!

Gyanghaemh, gwn caeuz gvaq le, dou daengx ranz vunz naengh ndaw ding yawj densi, gou sawqmwh dawz aen dangauh okdaeuj, daxmeh cingq siengj gangj gijmaz, daxboh doiq gou yaep da, gou sikhaek dawz fuk dozveh gou veh haenx soengq hawj daxmeh, daxboh hix lienzmuengz dawz faenh laex hung de okdaeuj, haenx dwg geu vunj gyaeundei ndeu, dou caez doiq daxmeh gangj:“Hoh mwngz ngoenzseng sim’angq!” Ciepdwk bek fwngz ciengq diuzgo hoh ngoenzseng. Daxmeh youh doeksaet youh angq, gikdoengh ndaej raemxda cungj aeng gvaengzda lo, gvaq le haujlai nanz cij gangj ok vah daeuj:“Docih sou lo!”Doeklaeng, daengx ranz vunz angqvauvau dwk gwn dangauh lo.

Dou gyaez daxmeh, daxmeh hix gyaez dou.

（指导老师：韦彩芳）