Gou gig maij gvaqcieng, aenvih gvaqcieng gig nauhyied, yienghyiengh cungj moq, miz ndei gwn, youh ndei guhcaemz, dauqcawq cungj dwg angqvauvau.

Daengz ndwenlab, gak ranz gak hoh hainduj guh fungcangz lo, ngoenz 25 gvaq le, couh nyouq daengz haeuxfaengx rangfwdfwd lo, gou ngah gwn faengx, ngoenzngoenz gwn hix mbouj mbwq. Daengz ngoenzndaep, ranzranz cungj nyaengq nem doiq nem fukveh, gou yawjraen daxboh dawz mbawveh cih “福” nem dauqdingq lo, gipmuengz naeuz: “Daxboh, mwngz nem dauqdingq lo.” Daxboh riuhoho naeuz: “Mbouj law, haenx dwg gangj ‘福’ dauq lo.”

Gyanghaemh, dou daengx ranz vunz naengh youq henz daiz gwn caeuz, gwnz daiz baij miz haujlai cungj byaek, miz nohmou, nohgaeq, nohbit, nohbya…… daihgya miz gangj miz riu, bouxboux aennaj lumj dujva hailangh nei. Gwn caeuz gvaq le, gou yawjraen daxmeh daegdaengq youq ndaw gu ndaw rek louz di ngaiz di noh ndeu, gou gamjdaengz gig geizheih, daxmeh riu naeuz: “Bibi cungj miz lw ma!” O, laxlawz dwg yienghneix.

Ndwencieng coit, gou daenj geu buhmoq, angqvauvau bae goengheij daxboh daxmeh, daxgoeng daxbuz, daeg’au mehsimj …… cij byaij yaep ndeu, ndaw daehbuh gou couh bongzboedboed lo, haenx dwg cienzlok gyoengqde hawj gou! Daxgoeng gangj, duzfangz ceiq lau lwgnyez ndaw daeh raek miz cienzlok lo. Gou yaek dawz cienzlok sou ndei, gvaqlaeng aeu daeuj cawx saw cawx bit bae hagdangz doegsaw, gou lij siengj cawx gouh haizmoq he hawj daxbuz dem, hawj daxbuz rox gou gyaez de.

Daj ngoenzndaep daengz ngoenz cibhaj, dou moix ngoenz cungj gwn ndei youq ndei, ngoenzngoenz angqvauvau. Ndwencieng gvaq- bae lo, raeuz youh maj hung bi ndeu lo, gou youh miz dajsuenq moq lo.

（指导老师：韦江萍）