2015 nienz 10 nyied 30 hauh, gou youq Nanzningz camgya Vah- cuengh byaujyenj doxdax, siengj daengz yaek hwnj daiz byaujyenj, gou angq raixcaix!

Ngoenz haenx, gyanghaet hwnq- congz, gou gig gikdoengh, youq gwnz congz youh diuq youh dik, youh gangj youh riu. Gwn gvaq haeuxcaeux, couh hainduj dajcang lo, lauxsae bang gou daznaj, sien daz daejhau, caiq daz gemjnding, gaendwk veh bwnda, doeklaeng daz naengbak nding, yienznaeuz mbwn nit, hoeng, ndawsim gou cix raeujrubrub.

Daeujdaengz dieg doxdax Gvangj- sih Swhfan Yozyen, gizhaenx miz boux camgya doxdax, miz bingzveij lauxsae, lij miz haujlai bouxyawj dem. Byaujyenj doxdax hainduj lo, daeggo dahcej youq gwnz daiz byaujyenj, bouxyawj bekfwngz mbouj dingz, hoeng, gou mbouj miz sim yawj, cij siengj vaiq di daengz gou hwnj daiz. Aen youh aen cezmuz gvaqbae lo, daih 12 aen cezmuz, daengz gou hwnj daiz byaujyenj lo, gou sing hung ciengq diuzgo “Son Mwngz Hag Sawcuengh”, daengx aen hoihciengz cij dingqnyi singgo seuqset gou, gou lumz swhgeij cingq youq gwnz daiz doxdax, lumzbae laj daiz miz bingzveij lauxsae caeuq bouxyawj, gou sim’angq dwk doq ciengqgo doq diuqfoux, miz haujlai bouxyawj ciengj dwk ingj siengq gou, miz baenzlai vunz gyaez gou, gou sim cungj fiz lo. 3 faen cung daiq dinj lo, gou caen siengj caiq ciengq yaep ndeu, hoeng, yinhyoz gaenq dingz lo, gou cijndei gungjhwet docih daihgya, laj daiz sikhaek yiengj hwnj baenz raq baenz raq sing bekfwngz, haujlai nanz cungj mbouj dingz roengzdaeuj.

Daengz seiz gunghbu cingzcik lo, gou gikdoengh youh gaenjcieng, dang rox swhgeij ndaej 86. 40 faen seiz, gou “nga ”dwk cuengq sing daej lo, dahcej daeggo cungj siengj banhfap daeuj nai gou, lauxsae bang gou uet raemxda, hoeng, gou ndawsim lij gig nanzgvaq.

Baez doxdax neix, yienznaeuz gou mbouj ndaej daih’it mingz, yienz- naeuz miz di nanzgvaq, hoeng, de dwg duj va gyaeundei ndeu, hai youq ndaw gwndaenj gou, gou nyienh dawz duj va neix ciengxlwenx yo youq ndawsim gou. （指导老师：韦江萍）