Daengngoenz hoengzfwdfwd yaek doek roengz bya lo, de sou gij nditndat hwnjdaeuj, cij lw aen giuzfeiz hoengzyanyan ndeu.

Mbouj gvaq geijlai nanz, giuzfeiz mbouj raen lo, henz dinmbwn saek fwjhaemh ronghsag, gyaeundei dangqmaz, gij saek fwj geijlai saenzgeiz ha, miz saekhenjgim, miz saekndinghoengz, miz di saek gou cungj caengz raen gvaq, lauheiq bouxcanghveh cungj veh mbouj ok cungj saek haenx bw, gij saek ingj roengz gwnz dieg daeuj, go’nywj gofaex hix bienq henjgim lo.

Gou sijsaeq bae yawj gwnz mbwn, gwnz mbwn lumj miz duzlungz raezrangrang ndeu, duzlungz daengx ndang henjrwgrwg, de ndonj hwnj ndonj roengz, gwn fwj haiz mok, boq ok va raemx gyaeundei raixcaix, gou nunu lwgda caiq yawj, duzlungz couh mbouj raen lo. Fwjhaemh caen lumj boux sajmohsuz saenzgeiz ndeu ha, siengj bienq gijmaz saek couh bienq gijmaz saek, siengj bienq gijmaz yiengh couh bienq gijmaz yiengh.

Doeklaeng, lauxsae lwnh gou, fwjhaemh baenzneix gyaeundei, dwg aenvih daengngoenz doek bya seiz, gij ndit ndonj gvaq dagicwngz nanwt seiz, deng daihliengh hoengheiq fwnhswj sanq fat baenz gak cungj saek, saekhoengz caeuq saekhenj fat ok ceiq lai, ndigah raeuz yawjraen fwjhaemh dingzlai dwg saekhoengz caeuq saekhenj.

Daswyenz geijlai gyaeundei, geijlai saenzgeiz ha, gou gag roengz gietsim: Majhung le, itdingh aeu ndeindei bae ra ok mimiz daswyenz.

（ 指导老师：韦江萍）