Gou gig ngahgwn, cij aeu yawj- raen gijgwn ndei gwn, gou couh mboujguenj sam caet ngeihcibit, gwn haeuj bak bae caiq gangj. Yienghneix miz baez ndeu oksaeh lo.

Ngoenz haenx, gou iu geij boux doengzhag bae ndoi guhcaemz. Daengz dingj ndoi seiz, sawqmwh Vangz Feih sing hung hemq: “Vei, vaiq di daeuj, neix miz cungj makndoi ndeu gig ndei gwn bw!” Gou dingq gangj miz ndei gwn couh buet gvaqbae, va, baenz aen baenz aen makdumh gyaemqgywggywg, lumj gwnz haw gai ityiengh, gou nyaenx mbouj ndaej mbaet haeuj bak bae. Lij Meiz raen gou gwj gwn gwj ndwnj, yienq naeuz: “Mwngz gaej gaenj gwn, lauxsae gangj gvaq, cungj makdumh neix van lai, miz duznon roxnaeuz duzngwz raih gvaq, gojnaengz miz doeg, mbouj ndaej gwn, yaek gwn hix dawz baema aeu raemxgyu swiq gvaq cij ndaej gwn bw.” Vangz Feih hix naeuz: “Dwg ha, mwngz lij dwg gaej gwn lo.” Makdumh rangfwdfwd, youh diemz youh miz di soemj, gou gwn hwnjyinx lo, baenzlawz dingz ndaej roengzdaeuj? Gwn gaeuq caiq gangj.

Ma daengz ranz, miz saeh dahraix lo, gou dungx in raixcaix, youq gwnz congz ringx bae ringx dauq. Daxmeh daiq gou bae yihyen, yienzlaiz dwg gou gwn makdumh yinxhwnj. Bouxcanghyw bekbek mbaq gou naeuz:“Lwgmanz, baez- laeng mbouj ndaej ngahgwn bw!” Gou naj hoengz dwk ngaekngaek gyaeuj.

（指导老师：覃珍团）