Gwnz ndang nyaenma maj ok bwncim gengget raezri lo, goek bwn lij caiq maj caengz bwn yungzyubyub unqnemnem nanetnet dem——Duz nyaenma neix majhung lo!

Nyaenma gag yawjyawj swhgeij：Ha, gij saek bwn neix yied daeuj yied nding ndongq lo; diuz rieng neix mboengmbwtmbwt, byai rieng saek lij lai hau di. Doiq rwz soemsetset, youh hung youh daengj, lwgda youh raeh youh ndongq. De baenq ndang youh caiq yawj: Ha, ndang reuxri, daengx- ndang bwn youh raez youh na, gyaeundei dangqmaz. Caiq yawj geij duz ma ranznden haenx —— Hw, yakyawj raixcaix!

Nyaenma baez yawjraen geij duz ma ranznden couh simnyap, gyoengq- de mboujdanh rwixyawj, lij cungj haengj guhdoih haeujok, ciengzciengz raeuqngaengngaeng.

Nyaenma mbouj haengj caeuq duzma guhdoih. De ndang cangq ga geng, rwz raeh da ndongq, heuj soem ndaeng lingz, uk singj din riengj, dwg duz maenh’ak ndeu. Ndigah, de mboujlwnh daengz gizlawz, cungj ra ndaej gwn. Doenghgij duzbya、gyapbangx、duzgungq、duzbaeu ndaw raemx, doenghgij duznou、duzgaeq、duzbit gwnz dieg, couhcinj dwg doenghgij duzroeg duzdaek duznengz rox mbin, de cungj gwn ndaej daengz, miz seiz de lij angq ra di doenghgo daeuj gwn. De boux ndeu gag baebae dauqdauq, geijlai cwzcaih ha!

Nyaenma gietdingh lizhai ndoengfaex, bae gizgyae yawjyawj. Ngoenzneix, de youzyouz langhlangh, byaij le haujlai gyae, daeujdaengz rangh dieg raemx dumh ndeu. Sawqmwh, miz duz hanqmbwn ndeu fwt mbin gvaq gwnz dingjgyaeuj de, “bu” sing ndeu douh youq gwnz huz youzyatyat. Nyaenma bonjlaiz couh dungx iekngaungau lo, de yawjraen le couh angq raixcaix, ndawsim naemj: “Ha, duz roeg hunghanghang ndeu! Gou ndaej gwn donq imq ndeu lo!” Yienghneix, de ganjgip ndonj gvaqbae.

Ndaw huz lij miz gyoengq roeg hung he ne! Nyaenma angq dangqmaz, sikhaek “budung” diuq roengz ndaw raemx bae gyaep hanqmbwn.

Duz hanqmbwn neix cij yawj nyaenma mbat ndeu, ngiengx gyaeuj enj hoz youz bae coh gyoengq doih de. Nyaenma gyaep daengz henzgyawj lo, hanqmbwn lij mbouj vueng mbouj linj. Gyoengq doih hanqmbwn yawjraen le, humx gvaqdaeuj lo, lij iu roegbit、roeghanqbuengz、roegcaeuq、roeg- caeuqgvej、roegcaeuqsa、roeglaxceiz daeuj. Gizyawz roeg raemx raen le, hix gag gaen daeuj lo, aen bouhdoih duzroeg yied daeuj yied hung lo!

Nyaenma bonjlaiz laihnaeuz duzroeg raen de daeuj le couh hwk ndaej deuzmingh, de couh ndaej swngzgei gaeb duz ndeu daeuj gwn. Hoeng, baez neix, gyoengq roeg mboujdanh mbouj sanq deuz, dauq yied daeuj yied lai, gyoengq roeg laebdaeb humx gvaqdaeuj, de doek- saet lo. Caiq yawj gyoengq roeghung fwed gvangqmyang rengzrwd, de gag naemj: Danghnaeuz deng geij duz roeghung fak geij mbat couh ngunh caem roengz raemx bae dai lo!

Duznyieg doxgiet rengz couh hung, duzak gadog rengz couh nyieg! Seizneix, duz nyaenma ndaengndiengq maenh’ak neix yienznaeuz dungx iek- ngaungau hix mbouj ndaej mbouj gipmuengz buet deuz lo.

（Ganh Sozvwnz/甘说文）