Ranz gou ciengx miz duz malwg ndeu, dujrwz de ndaemndatndat, naj de hix dwg ndaemndatndat, bwn gwnz ndang miz di ndaem miz di hau, song ceh da de ndongqliklik, lij miz diuzrieng youh raez youh raeuz ndeu.

Miz ngoenz ndeu gyanghaet, gou lij caengz hwnq, malwg raen gou caengz hwnq, couh buet daengz ndaw rug heuh gou hwnqcongz, gou sikhaek hwnqcongz, cat heuj swiq naj, gwn haeuxcaeux, aemq daehsaw bae hagdangz. Malwg raen gou mbouj daiq hungzlingjginh, de couh gamz hungzlingjginh buet riengz laeng gou. Daengz hagdangz lo, miz doengzhag doiq gou gangj: “Siujhungz, baihlaeng mwngz gaen miz duz malwg ndeu.” Gou cienq ndang baez yawj, raen duz malwg ranz gou cingq gamz hungzlingjginh buet gvaqdaeuj. Gou angq dwk doiq malwg gangj: “Malwg, mwngz caen ndei, vaiq baema ba.” Malwg baetbaet rieng buet baema lo. Cuengqhag le, malwg youh buet daengz henz loh ciep gou ma ranz.

Miz ngoenz ndeu, mbwn yaek laep lo, miz bouxvunz he daeuj ranz gou. Malwg mbouj raen gvaq, de couh raeuqvaeuvaeu hwnjdaeuj. Gou buet okdaeuj baez yawj, dwg mehbaj daeuj lo. Gou couh naeuz:“Malwg gaej raeuq lo, dwg mehbaj daeuj hane.” Malwg sikhaek mbouj raeuq lo, lij daiq mehbaj haeuj ranz dem, malwg geijlai gvai ha!

Duz malwg ranz gou caen dwggyaez, gou gyaez malwg ranz gou.

(指导老师：陆小媚)