Miz ngoenz ndeu, daxboh caeuq daxmeh cungj bae guhhong lo, gou yawjraen gyaeujcongz miz gij buh daxboh caeuq daxmeh rieg roengz- daeuj haenx, sim siengj: Fanjcingq seizneix mbouj miz saeh guh, couh bang daxboh daxmeh saeg buh ba. Bohmeh dauqma gangj mbouj dingh lij haenh gou ne.

Hoeng, gou caengz saeg gvaq buhvaq, baenzlawz saeg ne? Gou sien aeu aenbat daeuj coux raemx, caiq dawz buhvaq cuengq roengz ndaw bat bae, yienzhaeuh aeu sijyihfwnj daeuj, aenvih daiq yungh rengz, raix ok haujlai sijyihfwnj, gou siengj gip hwnjdaeuj cuengq roengz ndaw daeh bae, hoeng sijyihfwnj youq ndaw raemx menhmenh yungz lo, gaenbonj dawz mbouj hwnj. Gou youq ndaw bat fou geubuh, raemx ndaw bat bienq haujlai fugfauz, caemhcaiq yied daeuj yied lai. Sawqmwh gou siengj hwnj miz vunz gangj gvaq, sijyihfwnj dwk lai le, aiq sawj buhvaq cimq vaih.Gou lienzmuengz dawz gij raemx ndaw bat raix bae mbangj he, caiq gya raemx roengzbae. Gou yungh rengz fou buhvaq, fou dwk fwngz cungj hoengz lo, gou youh yungh ga caij, itcig saeg daengz mbouj miz fugfauz bae. Hoeng gou riuj geubuh hwnjdaeuj baez yawj, hozbuh caeuq genbuh vanzlij saeg caengz seuq. Gou geiq ndaej daxmeh bingzseiz saeg buh seiz, mbouj dwg youq song giz neix lai dwk di sijyihfwnj ma? Gou couh ciuq gij fuengfap daxmeh youq hozbuh caeuq genbuh lai dwk di sijyihfwnj, caiq fou geij mbat, caiq aeu raemxsaw swiq, ya, caen seuq ha. Gou angq raixcaix, couh baez geu baez geu ciuq yienghhaenx saeg, mbouj geij nanz couh saeg buh liux lo, gou youh dawz buhvaq saeg seuq haenx bae dak youq gwnz saux.

Gou cingq dak buh, daxmeh guhhong dauqma lo, yawjraen gij buh dak youq gwnz saux, youh yawjyawj gou, daxmeh riu lo. Daxmeh naeuz:“Mwngz yawj mwngz dawz geuvaq mwngz loengh dumz lo.” Gou ngaem gyaeuj baez yawj, caen dahraix, geuvaq gou ca mbouj geijlai cungj dumz lo. Daxmeh youh naeuz:“Vaiq rieg roengzdaeuj, gou bang mwngz saeg.” Gou ngiengx gyaeuj naeuz:“Hw! Gou gag saeg.”

（指导老师 庾景喜）