Ranz gou ciengx miz duz meuz ndeu, bwn gwnz ndang miz hau miz henj, dwggyaez raixcaix, gou an aencoh hawj de heuh “mihmih”. Mihmih aen’gyaeuj luenzlili, de miz doiq lwgda ronghrikrik ndeu, baez daengz gyanghwnz laepngaungau, couh lumj song aen daengbau rox fatrongh nei, couhcinj duznou buet ndaej gig vaiq, hix deuz mbouj gvaq lwgda rongh de. De miz doiq rwz gig raeh ndeu, sing baenzlawz iq de cungj dingq ndaej nyi. Seiq cik ga de mbaeumbwtmbwt, byaij loh cungj mbouj miz saek di sing.

Mihmih gawq dam ninz youh dam guhcaemz. Gyangngoenz daengx ngoenz cungj raen de ninz, gijmaz cungj mbouj guh. Danghnaeuz miz vunz byaij gvaq, de hix dwg hai da yawj mbat he, youh laep da ninz lo. Ninz gaeuq lo, couh ndwn hwnjdaeuj, ietiet hwet, ajaj bak, saenqsaenq ndang, couh byaijyotyot bae guhcaemz. Ndaw gyanghongh, gwnz veizciengz, gwnz donghaz sang, de cungj bae daengz. Couhcinj gwnz dingj ranzvax, de hix gamj youq gwnz byaij bae byaij dauq. Miz seiz lij daj gwnz sang diuq roengzdaeuj, hix mbouj lau in.

Mihmih gaeb nou gig ak. Baez dingqnyi sing duznou, couh sikhaek coemj gvaqbae, baez coemj dawz duznou, bak couh haeb, yaepda duznou couh dai lo. Seizneix ranz gou mbouj miz nou lo, neix cungj dwg goenglauz mihmih.

Duzmeuz ranz gou youh dwggyaez youh gaeb nou ak, gou gyaez duzmeuz ranz gou.

(指导老师：陆小媚)