Gou gyaez dijyuz yindung, lumj dwk lamzgiuz、dwk bingh- banghgiuz、buet …… Hoeng ndawde gou ceiq gyaez dik cuzgiuz.

Geiq ndaej baez daih’it dik cuzgiuz, dwg boux daeggo he heuh gou caeuq de itheij dik, aenvih gou mbouj rox gij fuengfap dik giuz, doeklaeng deng dik ndaej ga cungj in liux. Gvaqlaeng, doenggvaq gou genhciz lienh dik, bonjsaeh dik cuzgiuz gou couh ngoenz beij ngoenz ak lo.

Sawj gou ceiq nanzlumz dwg baez caeuq roek nienzgaep doengzhag doxdax ndeu. Geiq ndaej baez haenx aenvih ban gou Cinz Hozlungz daiq yungh rengz dik, doeklaeng de lienz giuz daiq haiz dik haeuj aendou bouxwnq bae, sawj gyoengq doengzhag cungj riu ndaej dungx in bae.

Gawq gangj, ceiq caeux fatmingz cuzgiuz dwg Cung- guek, hoeng seizhaenx mbouj dwg heuh “cuzgiuz”. Cuzgiuz seizneix dwg daj Yinghgoz riuzok. Cienzgangj youq 11 sigij, Yinghgwzlanz caeuq Danhmwz miz ciengz hoenxciengq he, hoenxciengq sat le, vunz Yingh- goz mwh cingleix dieg hoenx- ciengq, raen aen ndokgyaeuj vunz Danhmwz ndeu. Aenvih ndaenq lai, gyoengqde couh aeu ga bae dik aen ndokgyaeuj neix, gyoengq lwgnyez he raen le hix daeuj dik, couh yienghneix, cuzgiuz seizneix okseng lo.

Moix baez caeuq daxboh yawj densi cuzgiuz doxdax, dingqnyi daxboh gangj aen guekgya lawz boux giuzyenz lawz gig ak, dangseiz gou couh geiq roengzdaeuj, hix ciemh- ciemh gyaez yawj cuzgiuz doxdax lo. Moix ngoenz cuengqhag, cijaeu ndaejhoengq, doengzhag iu bae dik giuz gou cungj gig vaiq vuenh ndei haiz vuenh ndei buh, cung daengz cuzgiuzcangz bae.

Gou gyaez dik cuzgiuz, aenvih de mboujdanh ndaej lienh ndangdaej, vanzlij daiq hawj gou angqyangz.

（指导老师：覃学廉）