Ngoenzneix dwg “roek it”ciet lwgnyez. Gyanghaet, dou byaij haeuj ndaw hagdangz, daengx hagdangz cungj dwg geiznding vahenj, gizgiz cungj dwg sing riu, gyoengq doengzhag bouxboux cungj angqvauvau.

Gyoengq doengzhag buen aendaengq, comz youq ndaw cauhcangz hagdangz, angqhoh aenciet swhgeij.

Hoih angqhoh hainduj lo, bouxcujciz cingsaenz gvaekgvaek byaij hwnj gwnz daizheiq cujciz cezmuz. Biujyienj cezmuz hainduj lo, miz ciengqgo, miz diuqfoux, miz siujbinj…… ndawde gou ceiq maij haenx dwg daeggo dahcej roek nienzgaep cuengqsingdoeg seigo haenx, gyoengqde gig miz gamjcingz bae doeg, sawj gou cungj dingq haeujmaez lo.

Gwnz daiz biujyienj cezmuz gig ndeiyawj, laj daiz sing bekfwngz mbouj dingz, hoih angqhoh itcig hai daengz banngaiz cij sat. Gyoengq doengzhag cungj caengz yawj gvaqyinx, gij singriu gyoengq doengzhag lij rwenz youq ndaw hagdangz. Daihgya cungj maqmuengh “roek it ” ciet lwgnyez bimoq vaiq di daeujdaengz.

(ngeih nienzgaep Vuz Mingz)