Laj dinbya baihnamz hagdangz, miz aen moh ndeu, seiqhenz moh yungh rin seiqfueng caep baenz, baihnaj moh soengz miz song aen beimoh, neix dwg aenmoh gwzming lezsw Luz Yilungz daxgoeng.

Luz Yilungz daxgoeng 1930 nienz seng, dwg vunz Vanzgyangh Swh’wnh Cin Mbanj Yinzhoz. 1951 nienz, Luz Yilungz daxgoeng 21 bi couh camgya Cungguek Yinzminz Gaijfangginh, camgya gvaq hoenx caeggeq, de hoenxciengq maenh’ak, baez doek baez laebgoeng. 1957 nienz, de gvanghyungz dauqma ranz lo. Dang bing dauqma le de youh dang minzbingh yingzcangj, mboengqhaenx lij miz mbangj caeggeq lamqlw, de youh daiq vunz caeuq caeggeq lamqlw doxhoenx, gaeb caeg seiz boihseiz deng bikmax nyingz deng, gvangh- yungz vutmingh lo, doeklaeng guekgya nyinh de guh gwzming lezsw.

Bineix ngoenz ciet cingmingz banringz, hagdangz dou daengx- gyoengq lauxsae caeuq hagseng gwed vagien, yamqdin naekcaem youh caezcingj daeujdaengz aenmoh Luz daxgoeng sauqmoh. Ndwn youq naj moh, daihgya caemdingh nyinhcaen dingq Luz Gaivangz lauxsae lwnh gij goj Luz daxgoeng lij lix seiz baenzlawz maenh’ak hoenx caeggeq. Gij ciengz- mienh hoenx caeggeq haenx youh yienh youq baihnaj dou. Dingq gij goj neix, dou cungj nyaenx mbouj youq lae raemxda lo. Luz daxgoeng vihliux baujhoh guekgya, vih hawj yinzminz saedceij gvaq ndaej an’onj vuen- yungz, de baenz coz couh vutmingh lo.

Raeuz ngoenzneix ndaej gvaq saedceij vuenyungz, dwg gwzming senhlez youq gwnz cancangz buek- mingh aeu ndaej baez youh baez swngli, doeklaeng vut sengmingh swhgeij vuenh daeuj. Raeuz guh boux hagseng, wnggai geiqniemh gyoengq- de, ciepswnj gij gvanghyung conz- dungj gwzming lezsw, raeuz yaek roengzrengz doegsaw, vih saedyienh Cunghvaz minzcuz fukhwng bae buet- guh.

（指导教师：覃月素）