Ranzmbanj gou youq Gveigangj, gizhaenx gingjsaek gig gyaeundei, va mak homfwd, bya heu raemx saw.

Seizcin, gomak oknyod lo, vadauz hoengzyanyan hai va lo, valeiz hausaksak hix hai lo. Rumzcin ci daeuj, goliux youq henz dah iq couh lumj dahsau gyaeundei nei cingq menhmenh roi gyaeuj de.

Seizhah, ndaw mbanj gomak maj ndaej mwncupcup. Duzbid youq gwnz ngefaex mbouj dingz dwk heuh. Gyoengq bouxlaux youq laj gofaex aeuliengz gangjgoj, gyoengq lwgnyez couh bae daengz diuz dah iq sawndikndik haenx dajcaemx guh’angq.

Seizcou, aenmak cug lo. Daihgya nyaengq dwk sou lwgmak. Seizneix danghnaeuz mwngz daeujdaengz aenmbanj dou, dou itdingh aeu gij mak ceiq ndei haenx hawj mwngz gwn gaeuq bae.

Seizdoeng, mbawfaex henj lo, raq rumz ci daeuj, mbawfaex daj gwnz gofaex foenfoen loenq roengzdaeuj, couh lumj duzduz mbungqmbaj yaeng’yaeng mbin dwk.

A, ranzmbanj gou geijlai gyaeundei! Gou gyaez ranzmbanj gou!

（指导老师：覃福奇）