Baihnaj ranz gou miz aen suenbyaek iq ndeu, ndaw suenbyaek daengx bi seiqgeiq cungj maj miz byaek, neix couhdwg aen suenbyaek daxbuz gou.

Buz gou bineix 80 bi lo, daengx ranz gou geij bi gonq gaenq buen bae ndawsingz youq, hoeng buz gou dailix mbouj haengj gaen bae, de naeuz: “Lajmbanj hoengheiq ndei, gwn byaek singjsien mbouj miz nungzyoz uqlah. Caiq gangj gou sij mbouj ndaej suenbyaek gou.”

Daxbuz haet daengz haemh cungj youq ndaw suenbyaek nyaengq gvak namh、dwk bwnh、rwed raemx、gaj non…… Gij byaek noix bwnh, daxbuz couh rap doengj bae daengz ranz ciengx mou daek aeu bwnh haexmou daeuj dwk. Ndaw suenbyaek ndaem miz gak cungj gak yiengh byaek, byaekbohliz、byaekbohcai、byaekgat、duhnoh、lwggwz、lwgbieng、 makyungz…… Seiz- lawz ndaem gijmaz byaek, go’byaek lawz maj geijlai ngoenz, daxbuz cungj rox, ndaw suenbyaek coengzlaiz mbouj hoengq gvaq.

Daengz ngoenz singhgiz, dou daengx ranz vunz ma lajmbanj, daxbuz couh angqvauvau bae ndaw suen aeu byaek youh oiq youh ndei gwn haenx ma hawj dou gwn. Yaek dauqma ndawsingz, daxbuz youh cang baenz daeh hung byaek hawj dou.

Byaek ndaw suen gwn mbouj liux, daxbuz couh dawz bae gai, gyoengqvunz cungj haengj cawx byaek daxbuz, mizseiz daxbuz lij soengq ndwi hawj vunz dem, byaek okfwngz le, aennaj daxbuz riu lumj dujva ityiengh.

（指导老师：廖永恒）