5 nyied 25 hauh, Duh’anh Yauzcuz Swciyen “song hag it guh” hagsib gyauyuz canghfwen Bouxcuengh hag Sawcuengh ciendaez beizyinbanh youq aen yienh neix Disuh Cin Mbanjhinghli siujyoz haiban. 50 boux yozyenz daj Mbanjhinghli、 Fwen Hezvei daeuj haenx, yaek youq aen siujyoz neix guh 17 ngoenz hagsib caeuq beizyin, beizyin neiyungz dwg Sawcuengh giekdaej cihsiz caeuq Fwencuengh cauxsij lijlun, neix dwg gij banhfap moq aen yienh neix mboujduenh cauxmoq doidoengh hong minzcuz vah saw.

Vih gyagiengz hong Sawcuengh Vahcuengh aen yienh neix, daezsang canghfwen Bouxcuengh yungh Sawcuengh cauxsij naengzlig, swnjcienz minzcuz vwnzva, doengzseiz doenggvaq gij hingzsik fwen doidoengh lajmbanj dangjcihbu “song hag it guh” hagsib gyauyuz gvangqlangh haiguh, Duh’anh Minzyijgiz caeuq Swcigih Minzyijveij lienzhab banh geiz beizyinbanh neix son canghfwen Bouxcuengh hag Sawcuengh. Baez beizyin neix cingj Guengjsae Fwen Yozvei veicangj Cinz Siengzcouh caeuq lauxsae Sawcuengh aen yienh neix daeuj hwnjdangz.

(Cinz Baujlieng/覃宝亮 Dangz Siumouz/唐秀谋)