Saw, dwg gij rongh ndaw laep; saw, dwg rumzliengz seizhah; saw, dwg buhmienz seizdoeng. Youq diuzloh majhung gou, saw, mbouj miz saek seiz mbouj buenx youq henz ndang gou. Dwg saw son gou dauhleix guh vunz.

Saw, son gou rox guh boux vunz lauxsaed ndeu. Geiq ndaej ngoenz- haenx dwg seizhah ngoenz gig ndat he, gou cij haj bi. Ngoenzhaenx, mbwn ndat raixcaix, cungj yaek ring cug vunz lo, sawqmwh dingqnyi laj laeuz miz vunz hemq:“Cawx sietdiuz lo, cawx sietdiuz lo, maenz ngaenz gaiq ndeu, maenz ngaenz gaiq ndeu.” Seizhaenx gou hozhawq raixcaix, siengj gwn sietdiuz dangqmaz, hoeng gou youh mbouj miz cienz, daxmeh youh mbouj youq ranz, mboujgvaq, gwnz daiz ndaw ranz cingqngamj miz geij maenz ngaenz. Doeklaeng, gou nyaenx mbouj ndaej bak ngah, couh aeu gij cienz haenx, roengz laeuz bae cawx sietdiuz lo.

Gou cawx sietdiuz ma ranz, gou gwn diuz sietdiuz caeg aeu cienz daeuj cawx haenx, ndawsim gig mbouj onj, lau daxmeh rox le moeb gou. Hoeng gou lij dwg gwn gaiq sietdiuz neix liux lo.

Daxmeh dauqma le, raen cienz gwnz daiz mbouj raen lo, couh cam gou:“Gij cienz gwnz daiz ne? Baenzlawz mbouj raen lo? Dwg mbouj dwg mwngz dawz bae?” Gou mbouj guh sing, mbouj gamj gangj caensiengq okdaeuj. Seizhaenx, gou gag siengj: Dai lo, dai lo, deng fatyienh lo, gou wng mbouj wnggai gangj gij cienz neix dwg gou aeu ne. Gou siengj bae siengj dauq, doeklaeng gietdingh gangj ok caensiengq.

Gou gietdingh gangj ok caen- siengq, dwg aenvih gou youq gwnz bonj saw he yawjraen aen goj he. Aen goj haenx dwg gangj Meijgoz cungjdungj Vazswngdun, mwh de lij iq mbouj siujsim raemj raek go makyinghdauz daxboh de gig maij haenx lo, Vazswngdun nyinh dwg de raemj, daxboh de deng Vazswngdun cungj cingsaenz gangj vahsaed nyinh loek neix gamjdoengh lo, daxboh mboujdan mbouj ndaq, lij byaujyangz Vazswngdun dem. Gou dwg aenvih aen goj neix cij gamj gangj vahsaed. Doeklaeng gou hix mboujdan mbouj deng daxmeh ndaq, lij ndaej byauj- yangz dem.

Saw, de hawj mwngz haujlai cihsiz, sawj mwngz hag rox baenzlawz guh vunz……

(haj nienzgaep Suh Fuzmingz)