Youq diuzloh majhung raeuz，miz haujlai baez daih’it: Baez daih- it doenghfwngz cawjngaiz, baez daih’it byaij lohlaep， baez daih’it ciengx doenghduz iq, baez daih’it hwnj daiz byaujyenj， baez daih’it naengh hojceh……aen youh aen baez daih’it lumj aen youh aen rizdin ityiengh，yaenq youq gwnzloh majhung raeuz. Hoeng，baez daih’it hawj gou nanzlumz haenx dwg ndaemnaz.

Geiq ndaej ngoenz seizhah nditndat ndeu，gou caeuq daxmeh dahcej doxcaez bae ndaemnaz.

Gyanghaet，mbwn ronghsagsag，rumz liengzsisi， dujva riunyumj， go’nywj ngaekgyaeuj，yienghyiengh cungj gig gyaeundei. Daeujdaengz doenghnaz lo，gou yaek sawqsawq，couh lumj naq liz gung ityiengh yiengq gyang naz buet bae，ngamq roengz daengz ndaw naz，gou byaij ndaej saemxsaemx saxsax，mbouj siujsim couh caeuq boengznaz dox- got doxumj lo，loengh ndaej daengx ndang cungj dwg namhboengz，lumj duz byanouq gyuek boengz nei. Dahcej yawjraen gij yiengh ndeiriu gou，riu ndaej got dungx hwnjdaeuj. Gou mbouj rox baenzlawz guh，couh cam:“Dahcej，vih gijmaz mwngz ndwn ndaej baenz maenh ne?” Dahcej naeuz:“Gou ngamq daeuj hag ndaemnaz seiz，hix caeuq mwngz ityiengh byaij ndaej saemx- saemx saxsax，hix laemx gvaq haujlai baez，seizneix gou daeuj ndaemnaz gaenq miz geij bi lo，guh lai couh sug lo.” Gou ngaekngaek gyaeuj naeuz:“O! Yienzlaiz dwg yienghneix ha!” Gangj sat， gou couh hainduj ndaemnaz lo. Gou fwngzswix gaem boggyaj，fwngz- gvaz daj ndaw fwngzswix mbek ok go’gyaj ndaem roengz ndaw naz bae， hoeng，gou ngamq daj ndaw boengznaz yut din hwnjdaeuj，ndang baez nyeng，youh laemx lo. Gou swnh dahcej caengz yawjraen， sikhaek ndwn hwnjdaeuj，lumj mbouj miz gijmaz saeh nei，laebdaeb bae ndaem. Gou laeglemx yawj dahcej，yawj de baenzlawz ndaem，cijraen dahcej ndaem ndaej youh vaiq youh soh. Gou nyaenx mbouj ndaej cam: “Dahcej， mwngz dwg baenzlawz ndaem ha，vihmaz ndaem ndaej youh vaiq youh soh ha?” Dahcej riu naeuz：“Ndaem lai le couh ndaem ndaej ndei lo.”

Seizgan gvaq ndaej gig vaiq，ndit dak youq gwnz gyaeuj dou ndatfwdfwd，dou gyavaiq suzdu ndaemnaz，mbouj geij nanz，couh dawz gaiq naz gvangqlangh haenx ndaem sat lo. Yawj go’gyaj gou ndaem ndaej mbiengmbieng mbeuj- mbeuj haenx，gou miz di mbouj ndei eiqseiq lo.

Yienznaeuz baez daih’it ndaemnaz gamjdaengz youh baeg youh naet，ndaem ndaej mbouj ndei, hoeng gou daj ndaw guhhong ndaej daengz haujlai yinxdaeuz.

（指导老师：覃红梅）