Simsienh hengz ndei bouxboux maij

Guh yak hengz rwix vunzvunz caengz

Vunzraeuz seiqseiz dox ingbaengh

Maengxangq doxbang gvaq ndwenngoenz

Youq rog guh saeh gauq vunzcaen

Youq ranz ganq reih baengh gaenhlaenz

Miz saeh ndeindei caez doxyaeng

Doxnyaek doxndaenq cix mbouj baenz

Duzyae lij miz sam mboengq giuq

Vunzraeuz baenzciuh loh gyaeraez

Doxhuz doxndei caemh doxgyaez

Byaijloh gvaddaez miz vunz rex

Naengh mwngz simdoeg caiq simndaem

Oksaeh vunz raen mbouj haengj leix

Haemz vunz mbouj bang gag boihseiz

Bonjsaeh caiq ak hix uengjfeiq

Nyienh raeuz ranzgwnz caeuq ranzlaj

Miz maz hojnanh caez doxbang

Daudwz laexmauh ndaej fazyangz

Duzfangz siengj depgaenh hix nanz

Mwngz rox nyiengh vunz sam faen naj

Vunz rox gingq mwngz haj faen leix

Coenzvah huzndei ce doekgonq

Miz cik miz conq mingh gyaeu raez