Yiengzlwg unqswnh, caeuq bouxwnq doxhuz, bouxlawz cungj haengj caeuq de guhcaemz, ndigah, de miz haujlai baengzyoux ndei. Duzvaiz、duzmax、duzlawz、duzmou、duzdouq cungj dwg baengzyoux ndei de, ngoenzngoenz cungj caeuq de guhdoih guhcaemz guh’angq.

Ngoenzneix vaiqhaemh, dienheiq haemq ndei, ndit byaiz rumzfifi, gingj haemh gyaeundei raixcaix. Yiengzlwg angq dangqmaz, gag byaij ok dou, bae gwnz bya guhcaemz.

Yiengzlwg cingq angqyangz nyouqnyouq hoengheiq singjsien sangjswt, dingqdingq roeg swenj dided, cimcim va’ndoi lengjli homfwt. Sawqmwh, daj ndaw caz faexnyaengq ndonj ok duz manaez ndeu. Manaez riunyaen naeuz: “Hwhw, gizneix miz duz yiengzlwg bizbwd ndeu, haengj- dingh ndeigwn raixcaix!” Manaez doq gangj doq coemj coh yiengzlwg, yaek gwn yiengzlwg. Yiengzlwg doeksaet- yat, fwt dawz doiq gaeu haenqrengz bae dingj, hemq gyoengq baengzyoux daeuj gouq swhgeij.

Duzvaiz cingq youq henzgyawj gwn nywj, fwt dingqnyi yiengzlwg hemq gouqmingh, de ngiengx gyaeuj daj geh cazfaex baez yawj, raen dwg duz manaez hung ndeu. De naemj: “Duz manaez neix youh hung youh ak, caemhcaiq lau lij miz gyoengq manaez dem, gou baenzlawz buek ndaej gvaq ne.” Naemj dwk sikhaek buetdeuz lo.

Duzmax hix youq gwnz bya, de dingqnyi sing hemq, ngaemgyaeuj baez yawj, raen dwg duz manaez ndeu, hix riengjret buetdeuz lo.

Duzlawz cingq yaek roengz bya baema, fwt dingqnyi yiengzlwg hemq, de sup dingz yamqdin roengzdaeuj ngeux gyaeuj yawj, raen dwg duz manaez ndeu, de caegcaeg ndonj roengz bya baema lo.

Duzmou daj dinbya ginggvaq, fwt dingqnyi yiengzlwg hemq, de yawjraen dwg duz manaez, bulu cung roengz bya ma ranz lo.

Duzdouq cingq youq dinbya gwn nywj, baez dingqnyi sing hemq, gijmaz cungj mbouj goq, lumj naq nei yatdiuq baema lo.

Duzma daj ndaw ranz okdaeuj, ngamq daengz dinbya couh dingqnyi yiengzlwg hemq gouqmingh, gijmaz hix mbouj naemj, gipmuengz cung hwnj bya bae. Cij raen de daj ndaw cazhaz lumj byajmig nei cung okdaeuj, gaemz ndeu couh haeb dawz hoz duz manaez. Manaez in ndaej cakndaundau, hoeng cix swenj mbouj ndaej saek sing okdaeuj. Manaez roxnyinh baezneix bungz daengz duzak lo, yaek dai lo, de mbouj gamj caiq cak saekdi. Duzma baegfofo haenqrengz gaeb dawz hoz manaez, baez soeng bak vuenh heiq, manaez couh swngzgei buetdeuz lo.

Yiengzlwg dauq daengz ranz lo, gyoengq baengzyoux ndei de cungj daeuj lo.

Duzvaiz sing goksak naeuz: Mwngz baenzlawz mbouj lwnh gou nyi ha? Doiq gaeu gou hunghaeng soemset raehrumrum, cijaeu gou baez gaeu, couh gaeu ndaej saej manaez okdaeuj.

Duzmax daemhdaemh din naeuz: Mwngz baenzlawz mbouj lwnh gou nyi ha? Gij daez gou gengget miz rengz, cijaeu gou yaengx daez baez dik, couh dik manaez gyaeuj dek bae.

Duzlawz hozndat maenj sing ndeu, naeuz: Mwngz baenzlawz mbouj lwnh gou nyi ha? Gou singmaenj ak, cijaeu gou baez maenj, couh hwk manaez mbei dek bae.

Duzmou fanfan bakmbwnj na de, naeuz: Mwngz baenzlawz mbouj lwnh gou nyi ha? Yawjyawj gij bakmbwnj gou——Cijaeu gou yungh bak baez gud, couh gud manaez roux roengz bya bae.

Duzdouq ndiengqndiengq din, riu coh yiengzlwg naeuz: Mwngz baenzlawz mbouj lwnh gou nyi ha? Gou yienznaeuz rengz iq, hoeng, gou buet ndaej vaiq, ndaej bang mwngz soengq saenq ra vunz daeuj gouq mwngz ha.

Daihgya gangj ndaej hoengh- hwdhwd. Hoeng, yiengzlwg ceiq siengj raen duzma, de yaek docih duzma gouq de. Hoeng seizneix cix dan mbouj raen duzma daeuj.

Ai, bouxlawz cij dwg baengzyoux ceiq ndei ne? Gyoengq baengzyoux baenzngoenz heux youq henz ndang, ciengzseiz caeuq mwngz guhcaemz, hawj mwngz angqyangz haenx dwg baengzyoux ndei lwi? Caencingq doxndei, mbouj dwg gvaivad roxgangj. Boux baengzyoux ndei wnggai dwg seiz youqgaenj sijndaej ietfwngz bang mwngz haenx ha.

(Ganh Sozvwnz/甘说文)