Siengj bae siengj dauq, gou cij fatyienh, gou lij caengz bauqdap gvaq bohmeh gou. Caiq siengjsiengj gyoengqde vih gou guh le gijmaz, aen’uk sikhaek yienh’ok baenz fuk baenz fuk veh daeuj——Mbwn lij caengz rongh, daxmeh couh hwnqdaeuj guh ngaizcaeux hawj gou; mbwn nit lo, gyoengqde lau gou dwgliengz, soengq buhlaengj daeuj hawj gou; gou fatndat baenzbingh lo, gyoengqde gip dwk lumj duzmoed gwnz fagu ndat nei, daengx ngoenz souj youq henz ndang gou……

Gyoengqde bingzseiz vih gou causim gangj hix gangj mbouj sat, gou ne, cungj dwg mbouj siengj saek mbat couh ciepsouh gij gyaez gyoengqde, cungj roxnyinh gyoengqde vih gou guh dwg wnggai.

Mwh gou angq, gyoengqde buenx gou riu; mwh gou doeknaiq, gyoengqde couh nai gou……

Doenghgij saeh iq neix, seizneix daeuj yawj, dwg geijlai hungmbwk ha! Gyoengqde couh lumj aenliengj nei, bang gou dangj fwn dangj ndit; gyoengqde lumj aendapdaeng, bang gou ciuq rongh loh baihnaj; gyoengqde lumj daengngoenz, hawj gou raeuj- rub……

Gou siengj, daj seizneix hwnj, gou couh aeu ciuhvunz gou daeuj bauqdap gyoengqde, gou rox gij bauqdap gou mbouj gaeuq dingj gij aencingz gyoengqde lumj mbwn nei hung, hoeng gou caenh gij rengz gou guh gou guh ndaej daengz haenx daeuj bauqdap gyoengqde, sawj swhgeij mbouj najmong, mbouj ienqhoij.

(haj nienzgaep Vangz Cwngyij)