Bi 1630, goengcoj ciuhgeq Mbanjgorenh Banh Yenzhwngj caeuq meh de daeuj daengz benq dieg Mbanjgorenh neix caux mbanj. Youq henz ndoeng hai naz ndaem haeux, hoeng baezbaez cungj deng nou caeuq roeg baenz gyoengq baenz doih daeuj caeg gwn gig youqgaenj. Bihaenx ngamq gvaq cieng, song mehlwg dawz geij gaen ceh haeux ceiq doeksat bae doek roengz dieggyaj bae, haetlaeng baez bae yawj, daengx nazgyaj cungj deng nou deng roeg sai gvaqdoh lo! Daxmeh simcieg dangqmaz, byaij coh henz dah yaek diuq roengz raemx dai suenq lo. Mwhhaenx, gyaeuj dah baihgwnz miz gep ronggya ndeu lumj aen ruz nei, fouzbembem roengzdaeuj, gwnz de miz sam aen doengzcienz, sam diuz bwn gaeq caeuq sam diuz yieng. Daxmeh nyinhnaeuz neix dwg mehmbwn daegdaengq soengq fuk daeuj hawj de, couh dawz gij doxgaiq haenx bae ma ranz lo. Gangj daeuj hix caen geizheih, song mehlwg aeu doengzcienz bae cawx ceh haeux dauqma caiq doek, cap bwn gaeq hwnj gwnz rangz hoij youq gyaeuj naz bibuengq, lumj duzromh youq gizhaenx hen, mbouj hawj gyoengq roeg nou daeuj nyoegnyamx naz haeux! Gij roeg gij nou caen mbouj gamj daeuj sai naz haeux dahraix. Songde youh ciuq yienghneix guh, youq gij nazreih wnq hix venj haujlai “duzromh”, doengxhaemh lij youq gwnz “duzromh” cap sam diuz yieng……Daj mbat haenx le, bibi naz haeux ndaej demsou, vunzding hwngvuengh, miz gwn miz daenj.

Gvaqlaeng gyoengqvunz aeu doengzcienz cap bwn gaeq cap yieng bae baiq dojdeih, aenvih haemq ndei daeuj guhcaemz, couh dawz daeuj guh giuz doxdwk guh’angq, giuzyieng couh yienghneix ndaej guh baenz lo. Doeklaeng vunz mbanj Banh Mung- lungz、Banh Cunzyinz song bohlwg ndaej cungqgawj, hwngdoengh gwnz- biengz, gwnz ciuzdingz guh sei hawj naeuz:“Song roeg caez mbin hoj raen daengz, bohlwg caemh buengj caengz miz gvaq”, caemhcaiq hawj gaiq benj ndeu, baihgwnz deugaek geij cih saw gim hung:“Hengzsienh Dingh Ak”, lij dawz ngaenz daeuj youq ndaw mbanj hwnj guh fouxguenj, naj fouxguenj baek song diuz geiz lungz saek lamz, angqhoh ranz vunz neix ok song boux gawjyinz.

Gyoengqvunz Mbanjgorenh vih gamjaen caemhcaiq geiqniemh vunz- ciuqgonq, couh daengx mbanj gawjhengz doxdax dwk giuzyieng hozdung hoenghhwdhwd, daj mwh- haenx hwnj, dwk giuzyieng hozdung couh ciemhciemh cienz daengz gak dieg bae lo.