Miz boux coz he maj ndaej yakyawj, cawz liux mbouj miz geijlai sang, lij laenggungq dem.

Miz ngoenz ndeu, de bae ranz boux yenzvai he cunz. Boux yenzvai neix miz boux lwgmbwk gig gyaeundei he, bouxcoz gyaez hwnj de lo, hoeng boux lwgmbwk yenzvai neix aenvih de yakyawj, mbwq de dangqmaz.

Daengz yaek lizhai seiz, bouxcoz haenq damj bae ra boux lwgmbwk yenzvai neix, bajbingq aen gihvei doeklaeng caeuq de gangjvah. Boux lwgmbwk yenzvai naj lumj bouxsien nei, bouxcoz caeuq de raennaj wnggai gig angq. Hoeng, bouxcoz doeknaiq dangqmaz, aenvih boux lwgmbwk yenzvai neix itcig mbouj cingqda yawj de. Doeklaeng, bouxcoz najmong dwk cam:“Mwngz saenq vunhyinh dwg mehmbwn dingh lwi?”

Boux lwgmbwk yenzvai neix lwgda yawj namh dap coenz vah he:“Gou saenq,” youh fanj cam de,“Mwngz saenq mbouj saenq?”

Bouxcoz dap naeuz:“Gou dingqnaeuz, boux sai ndeu okseng gaxgonq, mehmbwn couh rox lwnh hawj de doeklaeng de rox aeu byawz guh yah. Gou okseng seiz, couh rox byawz dwg yah gou lo. Mehmbwn lij naeuz yah gou mboujdan maj ndaej yakyawj caemhcaiq lij laenggungq. Seizhaenx, gou couh ngaeq mehmbwn:‘Mehmbwn a, boux dahsau he maj ndaej yakyawj caemhcaiq laenggungq dwg baenzneix camj, gouz mwngz aeu laenggungq de hawj gou, caiq dawz ndeiyawj gou ce hawj de.’ ”

Bouxcoz gangj sat, boux lwgmbwk yenzvai neix yawj da de gig caensim, ndawsim couh deng vah de gauxluenh lo, boux lwgmbwk yenzvai neix couh iet fwngz hawj de, doeklaeng couh bienqbaenz yah de lo. Gvanyah neix itcig doxgyaez daengz laux.