Doenghbaez gonq, miz boux lwgnyez ndeu gig maij daej. Daxmeh nyaenx mbouj ndaej couh caenh de ok rog bae, mbouj hawj de haeuj ranz.

De lij youq bak douranz daejnganga seiz, couh deng song duz nyouqnyen dingqnyi lo. Song duz nyouqnyen neix couh lox boux lwgnyez neix naeuz miz dieg ndeu miz aen deihgoengq he, gvaq gizhaenx bae de couh ndaej dauq daengz ndaw ranz de lo. Boux lwgnyez neix saenq lo, couh riengz song duz nyouqnyen neix bae lo. Ngamq lizhai ranz de mbouj miz geijlai gyae, couh deng song duz nyouqnyen haenx gaemh de daengz gwnz bya bae. Seizneix song duz nyouqnyen cij conh heuj okdaeuj, youh raez youh hung, de laepda mbouj gamj yawj, hix mbouj gamj daej. De niemh naeuz: Baezneix dai lo, wnggai dingq daxmeh de gangj, mbouj daej yienghneix lai.

Seizneix, duz nyouqnyen he doiq doengzdoih de naeuz:“Dou dwg gwn noh ndip roxnaeuz cawj cug caiq gwn?” Doengzdoih de dap:“Cungj dwg gwn noh ndip, gou doq gwn nywnx caez, baezneix yaek gwn noh cug.” Yienghneix couh dawz boux lwgnyez neix daengz gwnz feiz bae gangq.

Gvaq yaep ndeu, boux lwgnyez neix sawqmwh ok roet. Duz nyouqnyen he nyinhnaeuz dwg sing noh de gangq ndaej baenz, couh naeuz:“Noh cug lo, mwngz bae ra dawh, gou youq gizneix hen.”

Doengzdoih de naeuz:“Gou mbouj guh! Gou baez lizhai, mwngz couh gwn noh liux bae. Dou aeu itheij bae ra dawh.” Yienghneix, song duz nyouqnyen neix couh guhdoih bae ra dawh lo.

Boux lwgnyez neix dingq mbouj nyi sing song duz nyouqnyen haenx gangjvah caeuq byaij roen liux, couh laeglemx dwk cengq da, mbouj yawjraen song duz nyouqnyen, de couh doq ndwn hwnjdaeuj, buetfwtfwt dwk dauqbae ranz de. De baez daengz bak douranz de couh swenj:“Daxmeh a daxmeh, doeklaeng gou caiq hix mbouj daej lo, hai dou hawj gou vaiq di, baihrog miz nyouqnyen rox gwn vunz!” Daxmeh de couh hai dou hawj de haeuj ranz lo. Gvaqlaeng boux lwgnyez neix caiq hix mbouj daej lo.