Ndaw mbanj miz duz gaeqseng gyaeundei ndeu.

Miz ngoenz ndeu, de daeujdaengz henz dah, yawjraen aenngaeuz swhgeij youq ndaw raemx haenx, angq dwk naeuz:“Mwngz yawj gou, geijlai vifung geijlai gyaeundei ha. Aenraeuj nding’yanyan, aenda hunghanghang, bwn gwnz ndang wenjmyag gyaeundei raixcaix.” Cijraen de ngiengx gyaeuj enj aek, yienh’ok cungj saenzheiq vifung maenh’ak ndeu.

Gaeqseng daeujdaengz ndaw ndoengfaex, yawjraen roegdingfaex cingq bang gofaex dot duznon. De sing hung naeuz: “Roegdingfaex, mwngz yawj gou geijlai gyaeundei ha! Mwngz gamj caeuq gou beij byawz gyaeundei lwi?” Roegdingfaex naeuz:“Mbouj miz seizgan, mbouj miz seizgan! Gou cingq bang gofaex gaeb non ne!” Gaeqseng mbouj miz eiqseiq byaij deuz lo.

Gaeqseng daeujdaengz ndaw suenva, yawjraen duzrwi cingq aeu vafaenj. Gaeqseng dasang naeuz: “Duzrwi iq, duzrwi iq, mwngz yawj gou geijlai gyaeundei ha! Mwngz gamj caeuq gou beij byawz gyaeundei lwi?” Duzrwi ngiengx gyaeuj hwnj, naeuz: “Doiq mbouj hwnj, gou mbouj ndaej- hoengq, mwngz bae caeuq bouxwnq beij ba!” Gaeqseng cijndaej hujdeng- deng byaij deuz lo.

Gaeqseng daeujdaengz henz nazhaeux, yawjraen duzgoep cingq gaeb nonhaih, de byaij gvaqbae, naeuz:“Duzgoep, mwngz gamj caeuq gou doxbeij byawz gyaeundei lwi?” “Mbouj hoengq, mbouj hoengq! Gou cingq gaeb nonhaih ne!” Duzgoep han naeuz. Gaeqseng cijndei youh byaij deuz lo.

Gaeqseng youh daeujdaengz gwnz loh, yawjraen duz maxhau cingq doz haeux, de gipmuengz naeuz: “Duz maxhau, duz maxhau, mwngz gamj caeuq gou beij byawz gyaeundei lwi?” Maxhau naeuz: “Mbouj ndaej, mbouj ndaej. Gou lij guh hong ne! Mwngz yawj mwngz, daengx ngoenz doeng byaij sae byaij, hix mbouj vih gyoengqvunz guh saek di saeh. Mwngz rox lwi, aensim gyaeundei cij caencingq dwg gyaeundei ha!” Gaeqseng dingq le, najmong dwk ngaem gyaeuj roengzdaeuj lo.

Seizneix, gaeqseng ngoenzngoenz cungj youq mwh daengngoenz yaek hwnj ndwn youq gwnz rin hung haen’oo, coi vunz hwnq caeux.

Mwngz yawj, seizneix gaeqseng geijlai gyaeundei ha!

(seiq nienzgaep Vuz Meijyenz)