Haemhneix gou daej lo, dwg vih daxmeh dwk mazcoz daej.

Gwn gvaq haeuxcaeuz, gou vih ngoenzcog gauj Yinghyij cingq fuzsiz dwk, seizhaenx gyoengq- vunz Saujgim ndaw mbanj youh ra daxmeh gou “caep Cangzcwngz” lo. Sing “bibi baba” cauz dwk gou simnyap dangqmaz. Yienghneix gou byaij gvaqbae doiq daxmeh naeuz: “Meh, ngoenzcog gou yaek gauj Yinghyij, seizneix gou cingq fuzsiz ne, mwngz couh gaej dwk lo!” Daxmeh raemh aennaj naeuz: “Lwgnyez gaej guenj saeh boux- hung!” Saujgim youq henz haenx hix gaen dwk naeuz:“Deuz- deuzdeuz, neix youh mbouj dwg ranz mwngz, mwngz dah niq neix, ceizcaeux yaek haq bae ranz bouxwnq……” Daxmeh laebdaeb caeuq gyoengqde dwk mazcoz.

Gou yawj dwk、dingq dwk、siengj dwk, aenndaeng baez manh, raemxda lumj roixcaw mae goenq nei mboujdingz doek roengzdaeuj…… Daxmeh ha daxmeh, mwngz seizlawz cij ndaej lai di gvansim gou ciuqgoq gou? Nanzdauh mwngz bingzseiz lai cawx di buhvaq gyaeundei hawj gou, lai cawx di gijgwn ndei gwn hawj gou couh suenq gvansim luha? Mbouj dwg bw! Mwngz hawj gou gij gwndaenj “ndei” neix mbouj dwg gou siengj aeu ha. Gou maqmuengh ndaej daengz haenx mbouj dwg gijneix, dwg mwngz caencingq gvansim gou gyaez gou ha!

Gou ngaem gyaeuj byaij ma ndaw rug gou, naengh youq naj daiz dinghdingh cimyawj fuk veh venj youq gwnz ciengz haenx: Dax meh he cingq dawz cazbingj daeuj hawj dahlwg de cingq hagsib haenx. Gij raemxda saepndaengq cij rox gij simcingz seizneix gou ha.

(haj nienzgaep Gvanh Cujginh)