Ranz gou seiqdaih caemh ranz, buzgeq gou bineix gaenq 90 bi lo, daengx ranz vunz saedceij gvaq ndaej cibfaen vuenyungz.

Bineix, ngoenzseng dax- goeng gou 60 bi ngoenz haenx, daxboh gou vihliux hawj dax- goeng haisim, daegbied guh le daiz byaek rim ndeu, lij cawx ma haujlai dangzbingj caeuq lwgmak, dangyienz noix mbouj ndaej aen dangauh hung ndeu lo.

Gou yawjraen aen dangauh haenx, ngah dwk myaiz cungj rih lo, maqmuengh daxgoeng vaiq di diemj labcuk guhmbaenj, yienz- haeuh ndaek gaemz ndaek gaemz gwn dangauh.

Daxboh diemj labcuk le, daengx ranz vunz doiq daxgoeng bek fwngz angqvauvau ciengq: “Hoh mwngz ngoenzseng angq- yangz……” Ciengq sat le, gou bang daxgoeng boq ndaep labcuk, yienzhaeuh gou sikhaek ietfwngz bae cang vanj dangauh rim ndeu. Mwhhaenx, daxgoeng laengz dwk gou, naeuz: “Menh di.” Cijraen daxgoeng cienq ndang, song fwngz dawz vanj dangauh soengq hawj buzgeq, lij haenqnaj doiq dou naeuz: “Sou rox buzgeq sou seng gou ngoenz haenx lwi? Ngoenz haenx de geijlai indot geijlai hojnanh ha, de cakcangh baenz hwnzngoenz ndeu cij seng gou okdaeuj, seizhaenx mbouj gangj miz noh gwn, haeux lij gwn mbouj imq ha!”

Dingq le vah daxgoeng, yawj aen naj buzgeq ginglig hojnanh youh swnhsoh haenx, youh yawj aen dangauh hung haenx, gou rox lo, ciuhvunz banlaux sinhoj dwg- rengz ha, raeuz guh lwglan yaek hauqswnh bouxlaux cij ndaej.

（指导老师：廖永恒）