Youq reih byaekhau he, miz duz ndwen he. Duzndwen moix ngoenz cungj gaenxgyaek ndai- reih, aeu namh fan le baez youh baez, mbouj rox naetnaiq mbouj rox baeg.

Byaekhau ndaw reih maj ndaej gig noengq, hoeng miz go byaekhau ndeu gingciengz riu duzndwen, duzndwen dingq le mbouj dawz haeujsim, ciuqyiengh guh gij hong de.

Miz ngoenz ndeu, duzndwen youh roeb daengz go’byaekhau, go’byaekhau naeuz:

“Vei,‘duzndonjnamh’, mwngz youh guh gijmaz ha?”

“Gou bang mwngz soeng namh ha!”

“Gijmaz? Bang gou soeng namh? Ndei riu lai lo, yawj mwngz duz ndaemndwt neix, cij ndaej ndoj youq ndaw namh. Yawjyawj gou, gwnz ndang miz hau miz heu, geijlai ndei yawj ha, lij yungh mwngz bang?”

“Mwngz gaej cej daihbauq lo, mbouj miz gou, namh couh bienq geng, mwngz couh sup mbouj daengz raemx caeuq yingzyangj laj namh.”

“Hw! Mbouj miz mwngz, gou ciuqyiengh maj ndaej ndei! Mwngz youq henz gou, dauqfanj vaih gij gyaeundei gou. Daj seizneix hwnj, mwngz liz gou gyae di, gaej caiq dauqma.”

Duzndwen dingq le, ngauz- ngauz gyaeuj danq gaemz heiq he byaij bae lo. Gvaq mboengq seizgan he, mbwnrengx mbouj doek fwn, namh bienq geng lo. Go’byaekhau sup mbouj daengz raemx caeuq yingzyangj laj namh, mbawde ciemhciemh bienq henj, seizhaenx go’byaekhau ienqhoij naeuz: “Gou mbouj wnggai dasang, yawj mbouj hwnj duz- ndwen ha.” Hojsik gaenq ceiz lo, go’gyaekhau doeklaeng roz dai lo.

(seiq nienzgaep Cangh Mungnaz)