Goliux doekseng youq gwnz ndoi, ngoenznaengz ndit dak raeujrub, fwn rwed sangjswt.

Ngoenz ndeu, gwnzmbwn doek haujlai fwn roengzdaeuj, doenghgo ndoet raemx cungj imq yaek dingj mbouj ndaej lo, gwnzmbwn lij doek fwnz mbouj dingz. Goliux hix gaenq ndoet ndaej dungx bengq yaek dek lo. Banhaemh, youh doek ciengz fwn hung ndeu, raemxrongz rag dwk namh rin daj gwnz ndoi maenjhumhum dongj roengzdaeuj. Goliux doek- saetyat, sikhaek capmax maenh, hoeng, faq namh lajdin de deng raemxrongz baenz faq dongj loenq nod roengz ndoi lo. Goliux saemxsax mbat ndeu, haenqrengz capmax mbouj hawj swhgeij laemx, caeuq faq namh lajdin itheij riengz dwk raemxrongz nod coh laj dinndoi.

Goliux dap faq namhnaez daeujdaengz henz dah. Henzdah miz caz go’ngaih hung ndeu, goliux iet fwngz vax dawz go’ngaih, youh yungh rengz caijcaij doi namh lajdin, ndwn cingq lo. Hoeng, cij yaep he, youh miz doi namh ndeu daj gwnz ndoi nyoengx roengzdaeuj. Doi namh yied daeuj yied hung, moek dwk de baenzlawz cak hix ndwn mbouj ndaej daengj lo. Hoeng, de cix mbouj doeknaiq, couh cengqgengz ngeng dwk aenndang, haenqrengz mbouj hawj swhgeij laemx roengzbae.

Fwn dingz lo, daengngoenz okdaeuj lo. Goliux ngiengx gyaeuj coh daengngoenz, ndwn ndaej engq maenh lo.

Gizneix dwg henz dah, gyawj raemx youh ndaej dak ndit, goliux angq raixcaix, couh youq gizneix youq roengzdaeuj lo.

Ngoenznaengz duzroeg mbin bae mbin dauq, baenz gyoengq baenz gyoengq daeuj ranz de guhcaemz, douh youq gwnz mbaq gwnz gyaeuj de ciengqgo diuqfoux, nauhyied raixcaix. De angq dangqmaz.

Goliux youh maj sang lo, gwnz laeng gwnz gen maj nye moq okdaeuj, maj iet coh daengngoenz.

Mbouj nanz, raemxrongz youh daeuj lo, youh miz doi namh ndeu daj gwnz ndoi gyod nyoengx roengzdaeuj lo, youh nyoengx goliux caeuq faq namh lajdin nod doengh lo. Goliux mbouj ienq mbouj heiq, cungj geiq maenh gij vah daxmeh ——Miz ndit miz raemx couh miz maqmuengh.

Couh yienghneix, goliux buen le haujlai baez ranz, heux dwk diuzdah, lumj naengh aenruz menhmenh dep dwk diuzdah bae youz guhcaemz nei. De seizseiz cungj geiq ndaej aeu maj rag capmax, ndigah, gij rag de yied daeuj yied laeg, gij nye de yied daeuj yied lai, gij mbaw de yied daeuj yied mwn. Raemxrongz namhconj caiq hix nyoengx mbouj doengh de lo.

（Ganh Sozvwnz/甘说文）