Diuzloh majhung, de gaem fwngz gou, hawj gou roxriuj gijmaz dwg soeng- yungz. Mwh gou dam guh- caemz ma ranz gvaiz, de yungh gaiqfwngz raeujrub lumh aen’gyaeuj gou naeuz, haeux cawj ndei lo, vaiq swiq fwngz gwn haeux ba. Mwh gou dawz mbaw dancingzcik gauj ndaej mbouj ndei geijlai haenx ndwn youq baihnaj de, de riu dwk naeuz, mbouj youqgaenj, baez- laeng roengzrengz couh ndaej lo. Aenda de yubyab ok cungj rongh ndeu, gou rox, gijneix dwg soengyungz. Gou geiq ndaej, moix baez doek fwn, de cungj dwg boux daih’it soengq liengj hawj gou, lumh aen- gyaeuj gou, cam gou deng mbouj deng liengz. Gou geiq ndaej moix baez fatndat, de cungj dwg saeqsim ciuqgoq gou, de naeuz, baezlaeng yaek lai haeujsim di, lai daenj di buh. De aeu genbuh uet hanh najbyak, gou rox, gijneix dwg ndiep dwg gyaez. De couhdwg daxmeh gou.

Geiq ndaej miz baez ndeu, gyanghwnz, gou dungx- iek lo, gou hwnqdaeuj yaemj din yaemj fwngz byaij daengz ndaw dingdangz, ra bingj gwn. Gou laihnaeuz gou gig yaemj lo, hoeng lij dwg cauz ndiu daxmeh lo. Daxmeh raen gou gwn bingj, cam gou dwg mbouj dwg iek lo, gou mbouj eiqseiq ngaem gyaeuj roengzdaeuj. Daxmeh sikhaek bae bang gou cawj mienh. De dawz vanj mienh homfwdfwd he cuengq youq baihnaj gou le, cij rag aenndang naetnaiq de bae ninz.

Youq diuz loh majhung neix, miz de buenx, miz de gvansim, miz de hawj gou vuenyungz. Gou gyaez de, gou gyaez daxmeh gou!

(haj niengaep Vangz Vanjdingz)