“Cingmingz doek fwnmoenq, roen myag vunz sim you……” Moix bi daengz ciet cingmingz, gou cungj youq ndawsim doeg hot sei neix, daeuj gangjok gij simcingz gou doiq cojcoeng siengjniemh haenx.

Ngoenzhaenx, gou caeuq daengx ranz vunz doxcaez bae sauqmoh daxdaiq. Daengz aenmoh daxdaiq le, dou dawz sauqbaet roxnaeuz baengz, baet seiqhenz aenmoh, ut aensiengq daxdaiq caeuq aenbei seuq. Ciepdwk, dou diemj yieng, cuengq geij bog vasien, baijhwnj dangzbingj caeuq mak, doeklaeng youh coemh ceijcienz hawj daxdaiq, biujsi gij simcingz dou siengjniemh daxdaiq, nyienh daxdaiq youq lingh aen seiqgyaiq gvaq ndaej ndei. Gou maqmuengh daxdaiq baujyouh dou ndang cangq, saedceij gvaq ndaej vuenyungz. Seizhaenx, gou siengj hwnj gij saedceij gaxgonq gou caeuq daxdaiq youq doxcaez haenx. Mwh gou lij haemq iq, daxdaiq caengz gvaqseiq, daxdaiq gig ndiep gou gyaez gou. Seizneix, daxdaiq gaenq gvaqseiq lo, hoeng gij najriu hozswnh de lij geiq youq ndawsim gou.

Gingjsaek gizgyaez ingj haeuj da gou, duzroeg ciengq dwk go ndei dingq, seiqhenz cungj hai rim vahenj byaekyouzcai, gomiuz gofaex maj ndaej hoenghhwdhwd. Ciet cingmingz, hawj raeuz youq aen saedceij daegbied neix, mwh siengjniemh goxgonq, hix doiq daengzcog cungmuenx siengjmuengh, insik sengmingh, hawj swhgeij lix ndaej engq miz yiyi, gaej begbeg dohgvaq ciuhvunz gyaeundei neix.

(seiq nienzgaep Vuz Mingz)