Rumz cifengfeng, ndit raeuj- rubrub, mbwn lamz fwj hau, nditrongh ndonj gvaq conghcueng ciuq haeuj ranz daeuj. Gou naengh youq naj daiz, maezmwd yawj dwk rog cueng. Dingqnyi sing gyoengq nyez doih youq baihrog doxgyaep guhcaemz, gou cij siengj daengz ngoenzneix youh dwg ngoenz- singhgiz, hoeng daj gou hwnj sam nienzgaep le, ngoenzsinghgiz couh liz gou gig gyae gig gyae lo!

Banhaet gouj diemj buenq hainduj bae hwnj goq Yinghyij, itcig hwnj daengz cibngeih diemj buenq. Ma daengz ranz lij aeu sij cozyez Yinghyij lauxsae buci haenx. Sij sat le laihnaeuz ndaej soeng saek yaep, hoeng gou lienz soeng gaem heiq he cungj mbouj ndaej, daxmeh couh haeuj ndaw rug daeuj, dawz suyoz、yijvwnz caeuq Yinghyij sam dauq sigenj hawj gou, de naeuz:“Moix cou guh sam dauq sigenj, moix dauq song mbaw.” Gou sing iq naeuz:“Couh rox heuh gou hagsib hagsib, caen fanz.” Mboujliuh deng daxmeh dingqnyi lo, de hozndat naeuz: “Moix dauq caiq gya song mbaw.” Yawj baihlaeng daxmeh, gou cijndei naeuz:“Baenz.” Daxmeh minghlingh mbouj ndaej dingj, gou hainduj sij sij sij……

Daxmeh, gou lijgaij gij simcingz mwngz muengh dahlwg baenz fungh, hoeng gou mbouj nyienh guh roeglaej youq ndaw roengq majhung, gou siengj guh duzyiuh he, youq gyangmbwn mbin buek. Daxmeh cingj boiz ngoenz- singhgiz hawj gou.

(sam nienzgaep Cangh Laiz)