Gou daj iq couh simco daihlawq, gingciengz geiq gyaeuj lumz rieng.

Mwh gou hwnj it nienzgaep, mbouj dwg lumz daiq bit, couh dwg lumz daiq gyaucat, seizhaenx gyoengq doengzhag cungj mbouj nyienh ciq hawj gou lo. Miz seiz lumz daiq cozyez, lauxsae caeuq doengzhag cungj nyinhnaeuz gou mbouj sij cozyez, gou gejlwnh hawj gyoengqde dingq bak cungj unq lo, gyoengqde cungj mbouj saenq, vanzlij hawj doengzhag dang guh vahriu dem.

Miz baez ndeu, gyanghaet gaenj bae hagdangz, gou daenj vaq byonj lo, deng doengzhag riu le, gou cij mbouj eiqseiq buet daengz ndaw diengzhaex bae vuenh gvaqdaeuj, hoeng gij sibgvenq yaez simco gou lij mbouj gaij ndaej gvaqdaeuj.

Cigdaengz fatseng gienh saeh he, gienh saeh neix hawj gou ciengxlwenx mbouj lumz. Mwh hwnj ngeih nienz- gaep, lauxsae raen gou moix haet daeuj hagdangz gig caeux, couh hawj gou fucwz hai dou gyausiz hawj doengzhag, gou dapwngq le, swnh fwngz cuengq yaekseiz haeuj daehbuh bae. Daengz ngoenz daihngeih, daxmeh naeuz ngoenzneix mbwn nit, vuenh geu buh na he hawj gou, gou cungj lumz yaekseiz gienh saeh neix lo. Gou caeuxcaeux daeujdaengz hagdangz, gaenq miz song boux doengzhag daengz lo, gou ganjgip iet fwngz haeuj daehbuh bae aeu yaekseiz, hoeng baenzlawz cungj ra mbouj raen, gou sawqmwh siengj hwnj ngoenzlwenz yaekseiz dwg cuengq youq ndaw daeh lingh geu buh. Mbouj miz banhfap, gou cij ndei buet ma ranz aeu yaekseiz. Dang gou dawz yaekseiz dauqma daengz gyausiz, bakdou gaenq ndwn miz haujlai doengzhag, gou gamjdaengz daegbied doiq mbouj hwnj, cij ndaej doiq gyoengq doengzhag boizlaex. Daj baez haenx hwnj, moix baez gou ok dou gaxgonq cungj genjcaz doxgaiq yaek daiq haenx, yienghneix couh mbouj geiq gyaeuj lumz rieng lo.

Doenggvaq gienh saeh neix gou rox aen dauhleix he, simco mbouj dwglau, lau haenx dwg mwngz mbouj miz sim bae gaij. Seizneix gou mboujdan gaij gij yaezcawq simco daihlawq bae, lij aeu gij saehcingz swhgeij daezsingj doengzhag henz ndang, guh gijmaz saehcingz cungj yaek saeqsim.

(sam nienzgaep Gi Yenz)