Daxbuz ciengx miz geij duz gaeqlwg, ndawde miz sam duz gaeqseng iq, gwnz ndang gyoengqde longz buhgyaeu wenjmyagmyag, aenrouj gwnz gyaeuj nding’yanyan, yawj hwnjbae rengzrwdrwd, cing- saenz dangqmaz.

Miz ngoenz ndeu, gou cingq youq gyanghongh guhcaemz, sawqmwh dingqnyi baenz raq baenz raq singhep heuh’oo, daxbuz angq dwk naeuz:“Neix dwg gaeqseng iq cingq hag haen ne!” “Gij sing neix yak dingq lai lo!” Gou dwgcaengz dwk goemq aenrwz hwnj.

Banhaemh daxmeh guhhong ma daengz ranz, gou dawz gienh saeh neix lwnh hawj daxmeh nyi. Daxmeh dingq sing gaeqseng iq haen, riu dwk naeuz:“Gou rox- nyinh gaeqseng iq gig mbeihung bw!” “Vih gijmaz ha?” Gou ngeizvaeg dwk cam. “Gyoengqde yienznaeuz haen mbouj ndei dingq, hoeng mbouj doeknaiq, lij mbouj dingz lienh haen.” Gou siengjsiengj le, ngaek gyaeuj doengzeiq daxmeh gangj haenx.

Gvaq le haujlai ngoenz, “o o o!” Ndaw hongh cienz daeuj raq singgok he, gaeqseng iq hag rox haen lo, gyoengqde caen ak ha! Gou gig boiqfug dwk yawj gaeqseng iq, roxnyinh gyoengqde vifung raixcaix.

Daxmeh cam gou: “Gaeqseng iq hainduj hag haen danghnaeuz lau saetnaj, doeklaeng bienq ndaej baenzlawz yiengh ne?” Gou siengj cungj mbouj siengj couh han naeuz:“Haengjdingh hag mbouj rox haen.” Daxmeh siengj yaep ndeu, naeuz:“Mwh ngamq hainduj guh saehcingz, byawz cungj mbouj gojnaengz guh ndaej gig ndei, aiq deng vunz naeuz, lij aiq deng vunz riu, bungz daengz cungj cingzgvang neix, ciengeiz gaej lau, cijaeu genhciz guh roengzbae, cungj miz ngoenz ndeu guh ndaej ndei.”

Gou ngaekngaek gyaeuj, rox gij vah daxmeh dwg doiq gou gangj, aenvih gaxgonq gou cungj lau saetnaj, bungz daengz dwg- rengz couh veq gvaqbae. Gaeqseng iq guh buengjyiengh hawj gou, gou itdingh yiengq gyoengqde hagsib.

(ngeih nienzgaep Mung Vwnzcez)