Gou gyaez guh haujlai saeh, lumj buetyat、diuqfoux、vehveh daengj, hoeng gou ceiq gyaez haenx lij dwg yawj sawgovai.

Singhgiz gonq, Siujvei caeuq gou iek ndei seizgan bae cauhcangz hagdangz guhcaemz, gou yawj lij caeux lai, sai seizgan, couh yawj saw yaep he gonq. Siujvei youq ndaw cauhcangz cukcuk caj gou buenq diemj cung, hoeng lij mbouj raen ngaeuz gou, couh gipmuengz buet daengz ranz gou ra gou. De haeuj dou baez yawj, gou cingq gig maezmwd yawj bonjsaw《Sihyouzgi》ne. De hujdengdeng vix gou naeuz:“Gou youq cauhcangz caj mwngz, mwngz cix youq ranz caeg yawj golingz ha!” Gou mbouj ndei eiqseiq riu naeuz: “Mwngz yawj, gou cij goq yawj saw, aeu mwngz lumz bae lo, caen doiq mbouj hwnj.” Gou vix bonj saw《Sanhgoz Yenjyi》doiq de naeuz:“Mwngz gawqyienz daeuj lo, couh yawj saw yaep he caiq bae ba.” De dingj mbouj ndaej gou ngaeq de, hix naengh roengzdaeuj yawj saw lo. Yawj dwk yawj dwk, dou aeu gienh saeh bae cauhcangz guhcaemz lumz lo……

Youh miz baez he, daxmeh daiq gou bae haw guhcaemz. Baez daengz ndaw haw, gou couh ganjgip buet bae bouqsaw. Gou youq gwnz gyaqsaw ra daengz bonj saw《Gungjlungz Vangzgoz》gou gyaez haenx, couh heuh daxmeh cawx hawj gou. Daxmeh naeuz:“Mwngz ndaw ranz miz baenzlai saw lo, caj yawj sat le caiq cawx ba.” Gou rag gaiq fwngz daxmeh ngaeq de naeuz:“Meh, mwngz couh cawx hawj gou bonj he ba, couh cawx bonj he.” Daxmeh raen gou baenzneix ngaeq, de couh cawx hawj gou lo.

Gaenlaeng, daxmeh daiq gou bae youz sanghden seiz, gou swnh daxmeh mbouj haeujsim, youh daengz dansaw henzde bae yawjsaw. Gvaq yaep he, daxmeh ra gvaqdaeuj lo, sing hung heuh gou:“Sawmaeziq, ma ranz lo.” Gou cijndei sij mbouj ndaej ma lo.

Aenvih gou daiq gyaez yawjsaw, mboujguenj dwg youq ndaw ranz roxnaeuz youq hagdangz, daihgya cungj heuh gou “sawmaeziq”.

(sam nienzgaep Lij Sangj)