Mbawfaex couh lumj baenz fung baenz fung saenq, sij gij saek seiqgeiq, gangj ok simnyienh seiqgeiq gyoengqde.

Seizcin daengz lo, mbawfaex heuoiq lo, gwnz saenq mbawheu sij rim maqmuengh: Maqmuengh dujva vaiq di hai, maqmuengh gyoengqvunz ganjvaiq dajndaem, hix maqmuengh duzroeg caeux di okdaeuj coux ngoenzndei seizcin……

Seizhah daengz lo, mbawfaex deng nditndat dak dwk reuqret, yienghneix de couh youq ndaw saenq daezsingj gyoengqvunz ganjvaiq ndoj ndit. Ciengz fwn hung doek gvaq le, mbawfaex cij miz cingsaenz, de youh youq ndaw saenq heuh gyoengqvunz okdaeuj yietliengz, ngonzyawj va’ngaeux hai youq ndaw daemz haenx……

Seizcou daengz lo, mbawfaex bienq henj lo, swnh rumzcou youq gyangmbwn mbinbengbeng. Gou daj gwnz dieg gip hwnj mbaw mbawfaex he, yawjraen baihgwnz sij rim maqmuengh: Maqmuengh gyoengqvunz ganjvaiq bae mbaet aen mak gaenq cug haenx, maqmuengh saekheu gyaeundei menh di doiqsaek, maqmuengh mbwn gaej baenz vaiq bienq nit……

Seizdoeng daengz lo, gou yawj gofaex ndoqndatndat cam: “Mbawfaex bae gizlawz lone?”Gofaex lwnh gou: “Mbawfaex loenq roengz ndaw namh bae, caj binaj seizcin, de youh bin hwnj gwnz nyezfaex bae hane.” Gou daj laj faex gip hwnj mbaw mbawfaex henjroz ndeu, yawjraen gwnz saenq de sij rim de geijlai siengjniemh seizcin ha.

Mbawfaex dwg fungsaenq, dwg fung- saenq ndaw daswyenz sij hawj raeuz. Mwngz sou daengz caengz ha?

(seiq nienzgaep Bungz Menjyaj)