Ranz gou couh youq henz Nanzhuz Gunghyenz, mboujlwnh seiz lawz, Nanzhuz cungj dwg hawj vunz gamjdaengz vuenyungz. Gou gig gyaez aen Nanzhuz gyaeundei neix.

Nanzhuz gyanghaet gig dingh, aenhuz ninz youq ndaw gunghyenz, lumj aengingq nei, ronghcingx gyaeundei. Song hamq huz gofaex mwncupcup, duzroeg youq gwnz faex angq dwk ciengqgo. Va’nding faexheu cungj ndiu lo, cingsaenz gvaekgvaek coux ngoenz moq daeujdaengz. Goenglaux buzlaux ceiq gyaez youq henz huz dwkgienz lienhndang.

Nanzhuz banringz gig nauhyied, mbwnlamz dauqdingq ingj youq ndaw huz, duzbya youq ndaw huz youz bae youz dauq, fwj hau mbin gvaq, duzbya lumj youq ndaw fukveh nei angq youz.

Banhaemh, daeng song hamq huz rongh hwnjdaeuj lo, yubyub yabyab, daujingj youq ndaw raemx, caeuq ndaundeiq gwnzmbwn daxgyau doxingj, gyaeundei raixcaix. Gyoengq siujbaengzyoux guh sat cozyez le, angqfaengfaeng daeuj henz huz guhcaemz, bouxlaux youq henz huz diuq hwnj fouxgvangjcangz, nauhyied dangqmaz!

Aen Nanzhuz gyaeundei hawj gyoengqvunz angq youz cungj mbouj siengj dauqma!

(ngeih nienzgaep Gyangh Denhyij)