Youq gwnzbiengz, angqyangz ceiq cigndaej faenyiengj. Mwngz ndaejdaengz faenh angqyangz he, couh caeuq bouxwnq faenyiengj, hix hawj bouxwnq caez angq.

De dwg dah niq he, gwndaenj youq ndaw guh’wzyen, de mbouj miz gijmaz saeh angq. Hoeng miz ngoenz ndeu, de yawjraen henz loh miz nyeuq rin gyaeundei ndeu, saekheuloeg, gwnzde miz raizva. De angq dwk gip nyeuq rin luenz raeuz neix hwnjdaeuj, buet daengz laj suijlungzdouz bae swiq le youh swiq. Dah niq neix roxyiuj, neix dwg nyeuq rin’gyaeq bingzciengz he, hoeng youq ndaw da de, couh lumj nyeuq rinbauj he baenzneix dijbauj. De siujsim riri gaem nyeuq rin neix, aenda gaenjgaenj cim dwk de, lumjbaenz lau de buetdeuz nei.

De buet daengz ndaw fuengz bae, de siengj caeuq bouxwnq faenyiengj gij angqyangz swhgeij. De caeuq dah niq he naeuz:“Neix dwg gou youq henz loh gip ndaej, mwngz raen de ndeiyawj lwi?” “Gyaeujndei lai lo!” De youh heuh doengzhag wnq daeuj yawj. Cij yaep ndeu, gyoengq lwgnyez cungj buet gvaqdaeuj lo, angq dwk cam:“Mwngz gip ndaej gijmaz ha?” De angq dwk naeuz:“Gou gip ndaej doxgaiq beij rinbauj lij dwggyaez!” Gangj sat, couh dawz nyeuq rin neix yaengx hwnj sang. Nyeuq rin youq laj daeng yienhndaej ronghmyabmyab. “Va!” Gyoengq lwgnyez cungj geizheih cimyawj nyeuqrin, daihgya cungj caez haenh hwnjdaeuj. Gyoengqde cungj hozhaenz dahniq miz faenh “angqyangz” neix, cungj siengj ndaej gaem nyeuqrin youq ndaw fwngz swhgeij. Dahniq yawj ndaej ok gij lwgda gyoengq lwgnyez cungj maqmuengh neix, roxdaengz faenh angqyangz neix yaek caeuq bouxwnq faenyiengj, ndigah dawz nyeuq rin- gyaeq yaengx sang haenx cuengq roengzdaeuj, naeuz:“Sou daeuj lumh- lumh de, raeuz caez guhcaemz ba!” Sawqmwh, aen fuengz neix beij seizlawz cungj angqyangz nauhyied.

Gyoengq lwgnyez gig gyaez nyeuq rin neix, couh siengj dawz nyeuqrin cuengq youq gizdieg yienhda. Miz mbangj naeuz cuengq youq ndaw suijsiz, miz mbangj naeuz cuengq youq ndaw gangbya, doeklaeng dahniq naeuz: “Angqyangz yaek caeuq bouxwnq faenyiengj!” Ndigah daihgya gietdingh, dawz nyeuq rin neix dauq cuengq daengz henz loh bae.

Angqyangz yaek caeuq bouxwnq faenyiengj. Dahniq ndaw guh’wzyen guh daengz lo, gou hix yaek yienghneix, danghnaeuz raeuz cungj rox angqyangz yaek caeuq daihgya faenyiengj, yienghneix sojmiz vunz cungj ndaej angqyangz lo!

(Yangz Mung)