Geizco 60 nienzdaih seizhaenx, gij dwzvu gozminzdangj youq Meijgoz dingjhwet lajde, lai baez ciemqfamh gij dieg henzhaij guek raeuz, siengjndwi guh baenz diuz “roq hongh youzgiz” ndeu daihgveihmoz ciemq- famh daihloeg. Gij dieg henzhaij Digih Ginhcouh dwg aen muzbyauh cujyau gyoengqde caegdoh ndeu. Veiz Gozcingh aenvih de dwg bouxbing ndigah gig minjganj, doq lienz Cibfanh Byahung caeuq dieg henzhaij Digih Ginhcouh hwnjdaeuj. De nyinhnaeuz, vunzdig danghnaeuz youq gij dieg Ginhcouh caegdoh ndaej baenz ne, bietyienz ndonj haeuj Cibfanh Byahung bae ndoj, youq gij dieg bya dieg lueg vunz gig siuj caemhcaiq gyaudoeng youh mbouj fuengbienh laebbaenz dieggoek, aen muzbyauh vunzdig feihgih cuengqvunz hix dwg Cibfanh Byahung.

De youq gwnz baez Hoih Cangzveij Dangjveij Swcigih daezok, gij dieg hingzcingq seizneix saed- hengz, veh henzhaij caeuq Cibfanh Byahung baenz song aen swngj、gih, doiq hoenxdingj vunzdig mbouj leih, vihliux engq fuengbienh gaem ndaej gij cingzgvang henzhaij baihnamz guekcoj, gyagiengz Digih Ginhcouh caeuq Cibfanh Byahung hoenxdingj vunzdig caeuq Guengjsae ndaej cigsoh lienzhaeh, raeuz dwg mbouj dwg yungh gij mingzeiq Dangjveij Swcigih, sij faenh baugau he hawj Cungh- namzgiz, cingjgouz dauqcungz veh Ginhcouh hawj Guengjsae. Gyauz Yaujgvangh、Vuj Cinnanz、Ho Hih- mingz、Cinz Yinggih、Anh Bingzswngh daengj geij boux suhgi caeuq gij cangzveij wnq cungj doengzeiq gij yigen de.

Yienghneix, Dangjveij Swcigih bi 1964 ndwen 7 ngoenz 21 cingqsik sij faenh baugau he hawj Cunghnamzgiz. Youq neix gaxgonq, Veiz Gozcingh caeuq Dauz Cu hix doxyaeng gvaq aen vwndiz neix, Dauz Cu byaujsi ndaej bae ngeixngeix. Caj daengz baugau soengq hwnjbae le, Veiz Gozcingh youh bae ra Dauz Cu doiqnaj damz, Dauz Cu naeuz:“Gyoengq boux goengdaeuz Cungh- namzgiz gaenq doxyaeng gvaq, cobouh dingh veh Digih Ginhcouh hawj Guengjsae, mboujlwnh dwg hoenx- dingj vunzdig roxnaeuz guh hong ginghci, cungj dwg bietdingh、habdangq.” Aen vwndiz neix de gaenq lai bi ciengzseiz ngeixnaemj lo, de muengh Guengjsae hawj de di seizgan bae cawqleix gienh saeh neix.

Veiz Gozcingh hix fanjyingj gij yigen de hawj Couh Wnhlaiz cungjlij gvaq, cungjlij haemq lijgaij gij simnyienh lwgminz Guengjsae, gangj caj seizgei baenzsug le cij ndei cawjleix.

Bi 1965 ndwen 3, boux cungj- canhmouzcangj Cunghgoz Yinzminz Gaijfangginh Loz Suigingh daengz Guengjsae ngonzcaz gij cingzgvang hwnjguh “sam sienq” caeuq bwh- hoenx. Veiz Gozcingh seizhaenx mbouj youq Namzningz, de daegbied daengq Cinz Yinggih boux guhbuenx cungjcangj ngonzcaz aeu fanjyingj gij yigen de. Cungjcangj daj baih bwhhoenx bae yawj, nyinhnaeuz bietdingh aeu veh Digih Ginhcouh haeuj Guengjsae. Gaenlaeng, de bae daengz Sauzgvanh Guengjdoeng, couh riengz Dauz Cu damz daengz gij yigen Veiz Gozcingh, Dauz Cu byaujsi doengzeiq gij yigen Veiz Gozcingh, hoeng lij aeu caiq caeuq Cau Swjyangz doxyaeng. Dauz Cu seizhaenx gaenq ndaej nyaemhmingh guh boux fucungjlij gozvuyen, hoeng lij guh boux suhgi daih’it Cungh- namzgiz, mbouj caiq giem boux suhgi daih’it Swngjveij Guengjdoeng, gij hong Guengjdoeng youz Cau Swjyangz bae guh. Dauz Cu doiq cungjcangj naeuz, seizneix de gaenq mbouj guh saek boux goengdaeuz Swngjveij Guengjdoeng, cawjleix gienh saeh neix couh yungzheih lai lo. De doq cingj Cau Swjyangz daengz Sauz- gvanh, Cau Swjyangz byaujsi doengz- eiq. Loz Suigingh dauqma Baekging le couh sikhaek gyoeblwnh gienh saeh neix hawj Couh Wnhlaiz cungjlij. Cungjlij nyinhnaeuz, gij seizgei gaijgez aen vwndiz neix gaenq baenzsug lo.

1965 ndwen 6 ngoenz 26, gozvuyen gaengawq gij cingjgouz Cwngfuj Lwgminz Swcigih Boux- cuengh caeuq Swngj Guengjdoeng, cingqsik veh Digih Ginhcouh hawj Guengjsae . Daj seizhaenx hwnj, Guengjsae youh youz aen dieg dieghawq bienqbaenz aen dieg henzhaij ndeu. Aen gaijbienq neix, mboujdan doiq gyamaenh hong henre diegbien henzhaij baihnamz guekcoj miz gij yiyi canloz hungloet, caemhcaiq doiq Guengjsae guh hong ginghci miz gij yingjyangj gyaeraez.”

(caengz sat)

guenj Guengjsae Bi

□ Hoz Saubangj sij Cinz Siengzcouh Liuz Gingliuj Cinz Siengzgen hoiz