Ngoenzneix daxmeh roengzban ma daengz ranz, gou raen de mbouj daih angq, dwg hwnjban baeg lai, roxnaeuz bungzdaengz gijmaz saeh simnyap ne?

Yawjraen gij yiengh nyapnyuk daxmeh, gou gig sim’in, couh gvensim dwk cam: “Meh, mwngz miz gijmaz saeh simfanz ha?” Daxmeh mbouj naihfanz naeuz:“Saeh vunzhung, lwg- nyez mbouj rox law.”

Gou mbwnjbak cingq yaek byaij bae, sawqmwh siengj ok aen cawjeiq ndeu. Gou doiq daxmeh naeuz:“Meh, gou gangj aen goj ndeu hawj mwngz ba! Gaxgonq miz buzlaux ndeu, de miz song dah lwg, dahlwg hung haq hawj boux gai mauhdiemx he, dahlwg iq haq hawj boux gai liengj he. Baez daengz ngoenzgvengq, buzlaux coh nanzgvaq dwk naeuz:‘Ngoenzneix liengj lwggwiz iq mbouj ndei gai lo, dahlwg iq saedceij mbouj ndei gvaq ha!’ Baez daengz ngoenzfwn, de youh siengj hwnj mauhdiemx ranz dahlwg hung mbouj ndei gai, lijdwg siengsim nanzgvaq. Mboujlwnh dwg ngoenz- gvengq roxnaeuz ngoenzfwn, buzlaux cungj dwg mbouj haisim. Boux ranznden he nai buzlaux naeuz: ‘Ngoenzfwn mwngz siengjsiengj liengj ranz dahlwg iq ndei gai lo, ngoenz- gvengq mwngz couh siengj mauhdiemx dahlwg hung seng’eiq ndei lo. Yienghneix siengj, mwngz mbouj dwg couh ngoenzngoenz angq luma?’ Buzlaux dingq gij vah ranznden, roxnyinh gig miz dauhleix, daj seizhaenx hwnj couh ngoenzngoenz angqvauvau lo.”

Daxmeh dingq sat aen goj neix le, doeksaet dwk cam： “Mwngz dwg daj gizlawz dingq daengz aen goj neix ha?” Gou han naeuz：“Dwg youq gwnz saw yawj daengz. Aen goj neix lwnh raeuz, mboujguenj bungzdaengz gij- maz saeh, cungj aeu vuenh aen gakdoh he siengj vwndiz, yiengjneix cij bienq ndaej vaiqvued. Gou naeuz ndaej deng lwi?” Daxmeh angq dwk riu naeuz：“Mwngz gangj ndaej gig ndei, daxmeh dingq mwngz.”

Yawjraen gwnz naj daxmeh dauq riu hwnjdaeuj, ndawsim gou angq lai lo.

(ngeih nienzgaep Mung Vwnzcez)