Seizcin daengz lo, gyoengq- vunz cungj duet buhmienz nanwt roengzdaeuj, vuenh hwnj buh- mbang, byaij haeuj ndaw seizcin bae, yawjyawj gingjsaek seizcin.

Ndaw suenva, va gomak- gingq hai ndaej ceiq caeux, limqva de dwg luenzgyaeq, ndaw saekhau cab miz saekmaeq. Mbungqmbaj caeuq duzrwi vung- vung veve gongz dwk heux dujva mbin bae mbin dauq, gou roxyiuj, gyoengqde dwg aeu faenjva. Gou hix dep gyawj dujva, yungh rengz nyouq, raq heiqhom he ndonj haeuj conghndaeng gou bae, caen hom ha！Gvaiq mbouj ndaej duzrwi caeuq mbungqmbaj cungj deng yinx gvaqdaeuj lo!

Ndaw gunghyenz, nye faex- liux daeuq ok di heuloeg he, nye de raezrangrang, lumj byoem raez dahniq nei; nyeliux unqnem- nem, dwg gaiqcouzheu cug gwnz ndang dahsau seizcin ba? Ngaz- faex oiqnemnem daj gwnz nye- liux ndonj aen’gyaeuj iq ok- daeuj, gyoengqde youq ndaw rungj rumzcin bi bae bi dauq, lumj ninz youq ndaw gyoivenj nei cwxcaih dangqmaz.

Ngiengx gyaeuj muengh, gwnzmbwn mbin miz gak saek gak yiengh yiuhrumz, miz yiuh- rumz duzyiuh、yiuhrumz mbungq- mbaj、yiuhrumz duzbyagim…… daihgya mwngz gyaep gou buet, cungj siengj swnh rumzcin raeujrub cwxcaih mbin youq gyangmbwn.

Seizcin geijlai gyaeundei ha! Gou gamjdaengz swhgeij coemj haeuj ndaw rungj seizcin bae, daengx aenndang cungj yungz youq ndaw seizcin lo.

(sam nienzgaep Vuz Yezhanz)