Daxmeh cawx ndaej aen siengring he, siengj sawq swhgeij gag guh dangauh. Ngoenzsinghgiz, gou iu 7 boux doengzdoih daeuj cimz gij dangauh daxmeh guh haenx. Hoeng aenvih aenq mbouj cinj, liuh guh dangauh yungh liux lo, daxmeh cij guh ndaej 7 aen dangauh ityiengh hung.

“Gou mbouj gwn lo, sou moix vunz aen ndeu.” Gou miz di mbouj ndei eiqseiq naeuz.

“Dou moix vunz baen mwngz di ndeu couh ndaej lo.” “Mbouj ndaej bw, daxheiz guh baenz sinhoj, raeuz baenzlawz gag gwn ne?” “Lij miz boh’au、daxgoeng、daxbuz, hix baen hawj gyoengqde cimz ha!” “Yienghneix raeuz daeuj siengj banhfap.” Daihgya mwngz coenz gou coenz daujlun hwnjdaeuj.

7 aen dangauh, yaek bingzyaenz baen hawj 12 boux vunz, baenzlawz baen ne?

“Gou miz banhfap lo, vanzlij moix vunz baen ndaej 2 gaiq dem.” Gou soqlaiz suyoz hag ndaej ndei haenx naeuz.

Gyoengqdoih baez dingq, gipmuengz naeuz: “Vaiq di gangj baenzlawz baen!”

Gou mbouj gaenj mbouj menh naeuz: “7 aen dangauh mbouj yungzheih bingz- yaenz baen baenz 12 gaiq. Hoeng, raeuz ndaej sien baen 3 aen dangauh, moix aen bingzyaenz baen baenz 4 gaiq, itgungh 12 gaiq, moix vunz ndaej gaiq ndeu. Yienz- haeuh aeu 4 aen lw roengzdaeuj haenx cungj bingzyaenz baen baenz 3 gaiq, cungjgungh hix dwg 12 gaiq, moix vunz gaiq ndeu.”

Gou song sam mbat couh baen ndei dangauh, sien hawj daxboh daxmeh caeuq daxgoeng daxbuz moix vunz gaiq hung gaiq iq ndeu gungh 2 gaiq, yienzhaeuh caeuq gyoengqdoih angqfaengfaeng cimz hwnj- daeuj.

(seiq nienzgaep Cangh Swhfanz)