Daxmeh cawx di makmaenj he ma ranz, dajsuenq gwn haeuxngaiz le baen hawj gyoengq lwgnyez gwn, gij makmaenj neix couh cuengq youq ndaw buenz. Vannizya caengz gwn gvaq makmaenj, de nyouq le youq nyouq, ndawsim gig gyaez gij makmaenj neix, gig siengj cimzcimz gij feihdauh makmaenj. De youq baihnaj makmaenj byaij bae byaij dauq. Mwh ndaw ranz mbouj miz vunz, de nyaenx mbouj youq aeu aen makmaenj ndeu daeuj gwn lo. Gwn ngaiz gonq daxmeh geq gij makmaenj, raen noix aen ndeu. De couh lwnh hawj daxboh nyi.

Mwh gwn haeuxngaiz, daxboh naeuz: “Baenzlawz lo, gyoengq lwgnyez, byawz gwn bae aen makmaenj ndeu ha?” Daihgya cungj naeuz: “Mbouj gwn bw.” Vannizya naj nding lumj duzgungq cawj cug haenx, hoeng de hix naeuz: “Mbouj gwn bw, gou mbouj gwn bw.”

Daxboh naeuz: “Sou mboujlwnh boux lawz gwn, cungj dwg mbouj ndei; ceiq cuet haenx mbouj dwg di neix, ceiq cuet haenx dwg ndaw makmaenj miz ngveih bw. Danghnaeuz byawz mbouj rox gwn makmaenj, aeu ngveih mak hix ndwnj roengz dungx bae, yienghneix gvaq ngoenz ndeu, de couh dai lo. Gou yousim couhdwg aenneix.”

Vannizya saeknaj bienq hau lo, de naeuz: “Gou mbouj dawz ngveih ndwnj roengzbae ne, gou dawz ngveih vut ok rog cueng bae lo.”

Yienghneix, daihgya cungj riu lo, Vannizya cix daej lo. ([Ngoz] Lezfuh·Dozwjswhdai)

Vah gangj baihlaeng: Bien faenzcieng neix sij ndaej baenzneix swhyienz, baenzneix genjdanh, hoeng youh ndaej hawj vunz gag bae siengj gag bae dijvei. Doeg sat le, baihnaj raeuz lumj okyienh laeq lwgnyez huk ndaej gig dwggyaez he.

Daihgya cungj riu lo, dwg aenvih Vannizya najmong ienqhoij; Vannizya cix daej lo, cix gangjmingz de roxloeng caeuq nyinhloek.

Gyoengq lwgnyez, guh gijmaz saehcingz cungj yaek lauxsaed bw!