Gwnz ndoi faex mwn ndoeng nyaengq, ndit rongh rumz sangj, hoengheiq seuqset, gofaex heusubsub, va maeq mak rang. Roeggacak youq gizneix, geijlai cwxcaih ha!

Sawqmwh ngoenz ndeu, gyoengqvunz vih ndaem cungj faex yungzheih canh ndaej ngaenz ndeu, hwnj ndoi daeuj raemj faex coemh ndoeng lo. Ndoi ndoqndatndat lo, gaej bae gangj ra giz diegyouq lo, couh lienz ra giz ndoj fwn ndoj ndit yaep he cungj mbouj miz lo.

Yienghneix, roeggacak couh daengx- gyoengq mbin bae mbiengj ndoi haenx lo.

Gizneix miz aen lueg gvangq he, cungqgyang giz diegbingz dwg mbanj vunz, lajdinndoi dwg nazhaeux, seiqlengq bangxndoi dwg ndoeng makndae.

Roeggacak sikhaek youq ndaw ndoeng faexmakndae youq roengzdaeuj，nyaengq dwk caux rongz ok gyaeq faeg lwg. Ngoenznaengz roeggacak hwnj ndaej beij bouxguhhong lij caeux, nyaengq dwk gaeb non ra nengz gwn. Doenghgij duzdaek、ndungjndingq、duzgyaen、duzmbaj caeuq duznonnyaiq、saehaexmax…… mboujguenj dwg duz gwnz mbwn mbin roxnaeuz duz laj namh raih, cungj ndoj mbouj gvaq, deuz mbouj ndaej, cungj deng gyoengq roeggacak gaeb daeuj gwn liux. Faexmakndae seizseiz ndaej roeggacak hen, mbouj deng non haih saek di, maj ndaej mwncupcup. Ndaw doengh, gohaeux hix ityiengh, mbouj deng non haih, maj ndaej ndei raixcaix.

Seizcin, gyoengqvunz yawjraen faex- makndae va hai hoenghhwd, ndawsim mbouj miz daej. Seizhah, gyoengqvunz yawj dwk makndae rim nge rim faex, gyoengqde angq dangqmaz, gyoengqde aeu faexdwngx daeuj cengj nge mak, maqmuengh makndae aen- aen cungj maj ndaej ndei, daengz seizcou sou ndaej lai. Seizcou, gyoengqvunz raen mak mbouj noix saek aen, henjrwgrwg, baenz foengq baenz fiengh, gyoengqde riu dwk bak mbouj haep.

Yaepda couh daengz byaicou, ndaw doengh, haeux sou haeuj cang, doenghnaz hoengqhathat lo. Ndaw lueg, makndae hix mbaet bae gai yaek liux lo, cij lw henz mbanj gij makndae gyoengqvunz daegdaengq louz gag gwn haenx.

Seizdoeng yaek daengz lo, mbaw faexmakndae loenq liux lo, doenghduz hix cungj ndoj hwnjdaeuj lo, mbouj miz duznon duznengz lo. Roeggacak ra mbouj ndaej gwn lo. Danghnaeuz gizneix miz ndoeng faex nyaengq rum cab, roeggacak lij ndaej ra gij makndoi cehrum gwn, hoeng, gizneix cijmiz goengqndoi ndoqndatndat、doenghnaz hoengqhathat, bae gizlawz ra makndoi cehrum gwn ne!

Roeggacak cijndaej bae dot makndae gwn. Hoeng, gig vaiq, gyoengqvunz couh daeuj ciengj sou gij makndae baema lo.

Yienghneix, mbouj miz gij gwn gvaq doeng, roeggacak couh daengxgyoengq mbin bae gizgyae lo.

Roeggacak daeujdaengz lingh aen lueg, gizneix hix dwg ndoeng makndae ndeu. Hoeng, moix go gwnz dingj cungj miz geij aen makndae, aen’aen ndongqyanyan, lumj daengloengz nei lwenqda. Roeggacak daxbuz angq ndaej lae raemxda naeuz: “Doenghgij lwgmak neix dwg bouxcawj daegdaengq louz hawj raeuz duzroeg gvaq doeng. Gizneix vunz simndei, rox sim’in duzroeg, faen gij gwn hawj raeuz. Raeuz couh youq gizneix youq roengzdaeuj ba, bimoq couh lai bang gyoengqde gaeb nonhaih. ”

Yaepda seizcin youh daeujdaengz lo, gomakndae youh did ngaz biu mbaw, hai va giet mak lo. Hoeng, seizneix miz cungj nonnyaiq ndaem ndeu sanj ndaej ak, gig vaiq couh baenz cainanh lo. Aen makndae ngamq baenz naed lwggaet yienghneix hung couh deng nonnyaiq gwn sat lo.

Bineix, aen ndoeng mbouj miz roeggacak youq haenx aen makndae ndeu hix mbouj ndaej sou; aen ndoeng louz makndae hawj roeggacak gvaq doeng neix, miz roeggacak gaeb non, sou ndaej makndae lai raixcaex.（Ganh Sozvwnz/甘说文）