Seizcin rumz lai fwn noix, mbwn hawqsauj, dienheiq bienqvaq mbouj dingh, nanz baujciz aenndang sup haeuj caeuq baiz ok doxdaengh caeuq onjdingh, yinxhwnj sengleix gihnwngz saetdiuz baenz hwnjhuj. Lumjbaenz conghhoz sauj in、da nding saep、conghndaeng ndat manh、naengbak sauj dek、amqbak mbouj ndei、haex ndongj、nyouh henj daengj. Seizcin hawqsauj baen miz raeuj sauj caeuq liengz sauj song cungj, wnggai doiq bingh bae siu huj.

1、Liengz sauj. Liengz sauj dwg hawqsauj caeuq rumznit giethab ciemq haeuj ndang vunz yinxhwnj. Vunzbingh miz gan ae、myaiz siuj roxnaeuz mboujmiz myaiz、congh- ndaeng hawqsauj、conghhoz haenz, giem miz lau nit fatndat、gyaeuj in mboujmiz hanh daengj. Ndaej cawj cuk dangznding lwgraz dangq yw gwn. Aeu 50 gwz lwgraz、100 gwz haeuxsuen, di dangznding ndeu. Sien cauj lwgraz cug ngenz mienz. Dwk haeuxsuen cawj cuk gwd seiz gyaux dangznding lwgraz roengz caiq loq cawj yaep ndeu couh baenz gwn.

2、Raeuj sauj. Biujyienh ok gan ae、bak sauj、myaiz noix caemhcaiq rangh miz seimyaiz, nanz ae ndaej ok, mwh ae seiz aek in, ndaw myaiz miz lwed caemhcaiq buenx miz ndaeng saek gyaeuj in、lau nit ndang ndat daengj. De dwg youz heiqndat caeuq rumzndat giethab baenz, ndaej cawj cuk maklaeq dangznae guh yw gwn. Aeu ngveih maklaeq 50 gwz, haeuxsuen 100 gwz, di dangznae ndeu. Sien cab ngveih maklaeq soiq caeuq haeuxsuen dwk gu gya raemx cawj cuk gwd seiz dwk dangznae diuzfeih gwn.

Linghvaih, lij aeu haeujsim lai gwn byaekheu、lwgmak, geih gwn gijgwn manhget, lai gwn raemx. Seizcin fuengz hwnjhuj lij aeu haeujsim gwndaenj gvilwd, guhhong yietnaiq doxgiethab, habdangq yiet- naiq, cijndaej baujcang aenndang doxdaengh, daezsang menjyizliz.