“Dingling——”lingz hwnj- dangz yiengj lo, gyoengq doengzhag cung haeuj gyausiz, vaiqvet dawz saw yijvwnz okdaeuj, caj Guj lauxsae daeuj hwnjdangz.

Seizgan gvaqbae haujlai nanz, lauxsae lij caengz daeuj. Miz doengzhag lumj duznou nei laeglemx daengz bakdou gyausiz bae demq, yienzhaeuh ndwn youq gwnz gyangj- daiz sing hung hemz naeuz:“Dangz neix dwg dangz swyouz!” “Va!” “Ndei lai lo!” “Gaijfang lo!” Daengx aen gyausiz sawqmwh nauhyied lumj aen hawciengz nei. Gyoengq doengzhag mbangj gangj vah mbangj ciengq go, lij miz mbangj dawz sawgovai okdaeuj gig mizyinx dwk yawj hwnjdaeuj.

Banhcangj dauqdaej nyaenx mbouj youq lo, hujdengdeng byaij hwnj gyangjdaiz bae, gig yiemz dwk naeuz:“Andingh! Byawz mbouj souj gijliz gou couh geiq coh de roengzdaeuj!” Gyoengq doengzhag raen banhcangj huj lo, couh mbouj cauz geijlai, ndaw gyausiz sawqmwh caemdingh haujlai. Hoeng mbouj geij nanz, youh miz mbangj doengzhag gangjsebseb lo, doeklaeng sing gangj yied daeuj yied hung, ndaw gyausiz youh cauzhuhu lo. Banhcangj huj yaek dai, baenq ndang youq gwnz hwzbanj sij aen coh doengzhag veizfanj gijliz haenx.

Sawqmwh, gyoengq doengzhag fatyienh Guj lauxsae mbouj rox seiz- lawz laeglemx ndwn youq bakdou gyausiz. Daihgya ganjgip naengh ndei, ndaw gyausiz caemdingh ndaej fagcim doek gwnz dieg cungj dingq ndaej nyi nei. Guj lauxsae byaij hwnj gwnz gyangjdaiz, de yawj daihgya mbat he, gig yiemz dwk naeuz:“Sou youh mbouj sw’gyoz luha! Dwg mbouj dwg youh siengj fad lo? Ngoenzneix lai gya boix cozyez he!” “Gaej ha!” Gyoengq doengzhag foenfoen gouz dwk.

Lauxsae youq gwnz hwzbanj buci baenz aen hwzbanj cozyez he. Ae, camj lai lo!

(seiq nienzgaep Cang Beiyungz)