Lauxsae yijvwnz gou gig coz, ngamq camgya gunghcoz. De yienz- naeuz mbouj sang geijlai, hoeng yawj hwnjdaeuj gig yiemz. Mboujgvaq, caeuq de doxcaez youq duenh seizgan he le, gou cij rox, de gizsaed gig unqswnh.

Fuengfap sonsaw de caeuq vunz mbouj doengz, yienznaeuz youq ndaw hagsib doiq dou gig yiemz, hoeng de ciengz gawjhengz mbangj hozdung, hawj dou youq ndaw guhcaemz hag daengz cihsiz. Lumjbaenz, miz baez ndeu dangz gaghag, daihgya boih saw boih naet lo, de couh gawjbanh “yenjcangvei”, hawj gij doengzhag mbouj rox boih roxnaeuz daujluenh haenx hwnj daiz byaujyenj cezmuz. Neix hwk lau gij doengzhag mbouj ndeindei boih saw haenx lo. Daj baezhaenx hwnj, gyoengq doengz- hag couh gyaez boih saw lo, hix gyaez hagsib lo.

Lauxsae buci cozyez hix haemq noix, daegbied dwg ngoenzsinghgiz, lij mbouj beij ngeih nienzgaep lai. Daihgya daj ndawsim engq gyaez boux lauxsae yijvwnz neix lo. Hoeng, ndaw ban miz geij boux doengzhag cungj mbouj gyaez doengh uk, gingciengz cau cozyez bouxwnq. Miz baez ndeu, lauxsae cam boux doengzhag ndeu dwg mbouj dwg cau cozyez bouxwnq, boux doengzhag haenx baenzlawz cungj mbouj nyinh. Lauxsae yiemzleih naeuz, “Danghnaeuz mwngz mbouj dwg cau, gou couh mbouj gangj gijmaz lo. Danghnaeuz gaujsi mbouj rox, gou couh mbouj yienzliengh lo.” Gvaq yaep ndeu lauxsae youh naeuz: “Cau cozyez bouxwnq, couh lumj gwn gij doxgaiq bouxwnq geux gvaq haenx, mboujdan mbouj miz feihdauh, lij dungxfan dem.” Dingq daengz neix, boux doengzhag haenx ndwn hwnjdaeuj caensim naeuz: “Gou caiq hix mbouj cau cozyez bouxwnq lo.”

Neix couhdwg lauxsae gou caeuq bouxwnq mbouj doengz haenx.

(roek nienzgaep Vangz Senh)