Cozvwnz suijbingz gou gig ca, sij cozvwnz cungj sawj gou lumj bungz- daengz duzguk nei lau raixcaix, moix baez sij cozvwnz, gou cungj naemj hwnj naemj roengz, ra caenh gij sawloih gou rox haenx cij auqmanz sij ndaej bien cozvwnz he gyau hwnjbae.

Dangz yijvwnz, lauxsae youh bingzgangj cozvwnz lo, gou doiq cozvwnz mbouj miz saek di saenqsim haenx, caeux gaenq mazmwnh lo, hix mbouj caiq gaenjcieng caeuq lau lo, cij dwg mwnhsaeng naengh youq gwnz daengq. Seizgan lumjbaenz caeuq gou doxdingj nei, gvaq ndaej daegbied menh.

“Lajneix doeg geij bien fanvwnz, doeg bien Cwz Gyahcin gonq ba.” Sing lauxsae mbouj hung, “Cwz Gyajcin” geij cih neix lumj sing byajraez nei caq dwk gou moengjdoengj lo. Daihgya cungj hozhaenz yawj gou, gou cix lij youq gwnz daengq naengh dwk ngawhngwdngwd: Cozvwnz baezgonq sij gijmaz ha, lij ndaej hawj lauxsae yienghneix byaujyangz?

Gou hoizsaenz gvaqdaeuj, ndaw- sim gag angqvauvau. Lauxsae naeuz:“Cingj doengzhag ndaej byaujyangz haenx ndwn hwnjdaeuj, daihgya bekfwngz cukhoh gyoengqde, vanzlij hawj aen cuj gyoengqde youq haenx gya sam faen.” Ya! Gou dauqdaej ndaej vih ndaw cuj gya faen lo! Gou bingzseiz baknaek bakmwt, hwnj- dangz gig noix fazyenz, engq gaej gangj vih siujcuj ceng danaj lo.

Gou ndwn sohsisi, yawj banh- cangj doengzyiengh ndaej byaujyangz haenx, lij miz gij doengzhag bingzseiz cungj sij cozvwnz ndaej ndei haenx, gou gag siengj, ndaej caeuq gyoengqde ndwn youq doxcaez, ciepsouh lauxsae caeuq doengzhag haenh, caen miznaj ha!

“Bien cozvwnz Cwz Gyahcin, sij ndaej gig ndei, cinbu gig hung.” Lauxsae muenxeiq dwk yawj gou, aenda cungj dwg haenh caeuq gujli, gou geiq hwnjdaeuj lo! Gienh saeh ndaw cozvwnz sij haenx dwg gou miz gamjsouh sij okdaeuj, ndaej daengz lauxsae baenzneix haenh de, caen siengj mbouj daengz ha.

Gou cingq diemzsisi dingq lauxsae haenh gou, yi, boux doengzhag haenx yawj gou baenzlawz yienghneix gvaiq ha? Dwg da’nding, roxnaeuz mbouj saenq gou? De lumj dwg naeuz: “Mwngz baenzlawz gojnaengz sij ndaej baenzneix ndei? Haengjdingh dwg cau vunz!” Sawqmwh, simcingz gou gig ca, roxnyinh gig utheiq, gou gaenbonj couh mbouj dwg cau vunz!

Caen siengj mbouj daengz, cozvwnz sij ok caensaed gamjsouh gou, ndaej souhdaengz lauxsae byaujyangz! Gou gag roengz gietsim: Baezlaeng itdingh laebdaeb sijsaeq cazyawj, caenndang bae daejniemh, ceng’aeu sij ok engq ndei engq lai cozvwnz.

(roek nienzgaep Cwz Gyahcin)