Ngoenzndaep lajbyongh- ngoenz, daxmeh bau gyaujswj, de itmienh bau itmienh angqvauvau naeuz:“Gou dawz maenz ngaenz- dih neix bau haeujbae, couh baenz aen gyaujswj gimngaenz ndeu lo. Byawz gwn daengz, bimoq couh ndaej fatcaiz lo.”

Gou byaengq da yawj aen gyaujswj gimngaenz neix, siengj ok aen cawjeiq ndeu. Gou youq aen gyaujswj gok ndeu yungh rengz nyaenj aen geiqhauh ndeu, gag siengj: Yawjdaeuj aen gyaujswj gimngaenz neix itdingh haeuj gou lo.

Gyaujswj roengz rek lo, daxmeh yungh aensieg youq ndaw rek menhmenh hoed, gyaujswj hausagsag couh lumj baenz duz baenz duz bya doenghyubyub, youq ndaw raemx youz bae youz dauq. Yaepyet, aen gyaujswj gimngaenz mbouj raen lo. Gou gag siengj: Mbouj youqgaenj, fanjcingq gou guh geiqhauh lo, haengjdingh ra ndaej raen. Gyaujswj youq ndaw rek cawj yaep ndeu, gou fwt raen aendungx gyaujswj gawh hung lo. Cuet lo! Laxlawz gyaujswj cawj le couh gawh hung, yienghneix gij geiqhauh gou guh haenx lij raen mbouj raen ne? Gou gag siengj le, youh gag nai swhgeij: Mbouj youqgaenj, mwh gwn gou couh gwn lai di, gou mbouj saenq gou gwn mbouj daengz.

Gyaujswj daek hwnj daiz, gou gyajcang dungx gig iek, sing hung hemq: “Meh, mwngz daek hawj gou lai di.” Daxmeh aj bak hung, doeksaet yawj dwk gou, mwngz mbouj rox, bingzseiz gou gwn gig noix. Gou gwj gwn gwj gwn, gwn dwk aendungx cungj bengq liux lo, cungj mbouj raen aen gyaujswj gimngaenz. Daxboh daxmeh hix gwn imq lo, aen gyaujswj gimngaenz lij mbouj raen. Ndaw buenz cij miz geij aen gyaujswj lo, gou dawz dawh daeuj baez aen baez aen baek byoengq bae, vanzlij mbouj raen maenz ngaenzdih. Gvaiq lo, nanzdauh gyaujswj gimngaenz maj fwed mbin bae lo?

Gou mbouj gamsim, youh bae yawj aen rek cawj gyaujswj haenx. Yi, ndaw rek lij miz benq naeng gyaujswj ndeu, gou aeu aensieg daeuj vez, hai, dwg maenz ngaenzdih ninz youq daej rek, laxlawz dwg gyaujswj cawj yungz lo!

(ngeih nienzgaep Cangh Gyahyiz)