Ciet ndwencieng, lwgnyez ceiq angqyangz, bouxlaux ceiq nyaengq. Aenvih lwgnyez ndaej daenj buhvaq moq caeuq haiz moq, lij ndaej cuengq lwgbauq yiengj baba, ceiq sim’angq dwg sou ndaej cienzlok. Bouxlaux ne, nyaengq raixcaix, bwh gijgwn gvaq cieng, suek faengx, nem doiq, baetbaet swiqswiq youh uetuet, dawz aenranz ndawndaw rogrog cungj baet ndaej seuqsatsat bae.

Haemhndaep, daengx ranz vunz naengh youq henz daiz, vuenvuen heijheij gwn caeuzndaep. Nohgaeq、nohbit、 nohmou、 nohyiengz daengj baij rim daiz, siengj gwn gijmaz couh nip gijmaz. Daihgya miz gangj miz riu, geijlai nauhyied ha! Gwn caeuz gvaq le, gwnz daiz youh baij rim diengzdiengz bingjbingj、 lwgmak caeuq cehgva, mwngz siengj gwn gijmaz couh gag aeu daeuj gwn. Daxgoeng daxbuz naengh youq ndaw ding itmienh gwn lwgmak itmienh yawj densi ndwencieng vanjvei, daxboh daxmeh caeuq daxau mehsimj youq gwnz laeuz gyaet cehgva dwk bej, lwgnyez ne, ceiq angq lo, guh gijmaz bouxlaux cungj mbouj gvaiq, gou caeuq daegnuengx yaep ndeu bae rog cit lwgbauq, yaep ndeu buet hwnj buet roengz, gyaep bae gyaep dauq, hemqyaya, daengx ranz goenjhoho, hoenghdwddwd.

Daengz gyanghwnz 12 diemj cung lo, ndaw mbanj ranzranz cungj diemj lab baij mbabwt dajbaiq, gouz youq ndaw bi moq daihfat daihvuengh, ndangdaej cangq. Baiq gvaq le, gak ranz couh gag youq gwnz dingjlaeuz swhgeij cuengq bauq. Yawj, gij bauqva youq gyangmbwn hai va, hoengzhoengz loegloeg, lumj baenz aen baenz aen liengjva hung nei, mbiengj neix roengzbae le, mbiengj haenx youh hwnjdaeuj, mbouj dingz mbouj duenh, gyangmbwn lumj hai va nei, geijlai ndeiyawj ha!

Haet coit, daihgya raen naj cungj naeuz goengheij goengheij. Gou bae goengheij daxgoeng daxbuz ndangcangq, daxgoeng daxbuz riu- nyumj dwk hawj gou hoengzbau hung. Gou youh daj daxboh daxmeh daxau mehsimj gizhaenx ndaej daengz haujlai cienzlok, caen haisim ha!

Ngoenz co’ngeih daengz ngoenz coroek, gou caeuq daxmeh bae ranz mehdaiq ha, gaen daxbuz bae mbanj ha, miz bouxhek daeuj ranz gou ha, gaen daxboh bae yawj dwkgiuz ha, ngoenzngoenz cungj gvaq ndaej angqfwngfwng, aensim gou caen dwg angq ndaej beij gwn diengz lij diemz ha!

Ndwencieng saedcaih dwg saed- ceij vuenyungz angqyangz, gou maq- muengh saedceij baenaj hix gvaq ndaej vuenyungz angqyangz!

（指导老师：覃珍团）